ShQO-da sońǵy úsh jylda 65 polıtseı jemqorlyqpen ustalǵan
2022 jylǵy 19 mamyr 22:48

ShQO-da sońǵy úsh jylda 65 polıtseı jemqorlyqpen ustalǵan

ÓSKEMEN. QazAqparat – Shyǵys Qazaqstan oblysynda 2019-2022 jyldar aralyǵynda quqyq qorǵaý organynyń 65 qyzmetkeri sybaılas jemqorlyq qylmysyn jasaǵan, dep habarlaıdy QazAqparat tilshisi.

Bul jaıly Sybaılas jemqorlyqqa qarsy is-qımyl agenttigi ShQO boıynsha departamenti preventsııa basqarmasynyń basshysy Arhat Beısembaev polıtsııa qyzmetkerlerimen ótken kezdesý barysynda aıtty.

«Búgingi tańda eldegi sybaılas jemqorlyq deńgeıi tómendeýiniń oń tendentsııasyna qaramastan, quqyq qorǵaý organdary - jemqorlyq táýekelderine eń beıim salalardyń biri bolyp qalyp otyr. 2019-2022 jyldary Sybaılas jemqorlyqqa qarsy qyzmet Shyǵys Qazaqstan boıynsha atalǵan organdardyń laýazymdy tulǵalaryna qatysty 65 sybaılas jemqorlyq faktisin tirkedi. Búgingi tańda 22 adam qylmystyq jaýapkershilikke tartylǵan», - dedi ol.

Taldaý kórsetkendeı, qylmystardyń basym bóligin ákimshilik polıtsııa, jedel-tergeý jáne qylmystyq-atqarý júıesi qyzmetkerleri jasaıdy.

Negizinen jemqorlyq faktileri qylmystyq isti zańsyz qysqartý, ákimshilik jaýapkershilikten bosatý úshin para alýmen baılanysty bolyp otyr.

Sondaı-aq jıynda Arhat Beısembaev jemqorlyqtyń aldyn alý maqsatynda agenttik pen Іshki ister mınıstrligi arasynda ózara yntymaqtastyq týraly memorandým jasalǵanyn jetkizdi.

Esterińizge sala ketsek, osyǵan deıin Óskemen ákimine 159 myń teńge aıyppul salynǵanyn habarlaǵan edik.



Uqsas jańalyqtar

Jańalyqtar

MURAǴAT