ShQO-da sibir eligin atqan er adam ustaldy
2022 jylǵy 19 qańtar 14:59

ShQO-da sibir eligin atqan er adam ustaldy

ÓSKEMEN. QazAqparat – Shyǵys Qazaqstan oblysy Jarma aýdanynda sibir eligin atqan er adam ustaldy, dep habarlaıdy QazAqparat tilshisi.

ShQO Polıtsııa departamenti baspasóz qyzmetiniń málimetine súıensek, Jarma aýdanynda polıtsııa qyzmetkerleri «Semeı ormany» RMM mamandarymen birlesip, Qalbataý aýylynyń mańyndaǵy erekshe qorǵalatyn tabıǵı aýmaqty patrýldeýge shyqqan. Sonyń nátıjesinde, sibir eligin zańsyz atqan 53 jastaǵy Shemonaıha aýdanynyń turǵyny ustaldy.

«Jedel-tergeý toby qarda júretin «Ranger» kóligin, 20 kalıbrli «Saıga» myltyǵyn, 7, 62 mm kalıbrli «BROWNING» myltyǵyn jáne eliktiń etin tárkiledi. Memleketke keltirilgen materıaldyq zalal 2 000 000 teńgeden asady», - delingen aqparatta.

Atalǵan fakti boıynsha QR QK-niń 337-baby 4-bóligine sáıkes sotqa deıingi tergeý amaldary bastaldy. Kúdikti 3-ten 6 jylǵa deıingi merzimge bas bostandyǵynan aıyrylýy múmkin.


Uqsas jańalyqtar

Jańalyqtar

MURAǴAT