ShQO-da qys bastalǵaly beri qala, aýyl kóshelerinen 160 myń tekshe metrden astam qar shyǵaryldy
ÓSKEMEN. QazAqparat – Shyǵys Qazaqstan oblysynda qys bastalǵaly beri qala, aýyl kóshelerinen 160 000 tekshe metrden astam qar shyǵaryldy, dep habarlaıdy QazAqparat tilshisi.
ShQO TJD baspasóz qyzmetiniń málimetine súıensek, oblys ákiminiń ókimimen 1 aqpannan bastap óńirde sý tasqyny kezeńine joǵary daıyndyq rejımi engizilip otyr.
«Sý aıdyndaryna kúndelikti monıtorıng júrgizilýde. Qys bastalǵaly beri jergilikti atqarýshy organdar qala, aýdan kóshelerinen 160 000 tekshe metrden astam qar shyǵardy. Sý tasqyny qaýpi joǵary kezeń úshin jeke quramnan 1719 adam, 224 motopompa, 83 júzý quraly jáne 750-den astam tehnıka saqadaı saı. 29 000 dana ydys-qap, 1,9 myń tonna ınertti jáne 226 tonna janar-jaǵarmaı materıaldary daıyndaldy. Tótenshe jaǵdaıda halyqty evakýatsııalaý úshin qalalar men aýdandardyń ákimderi 6500 adam sııatyn 68 ýaqytsha ornalastyrý pýnktin daıyndady», - delingen aqparatta.
Shyǵys Qazaqstanda sý basý qaýpi týyndap otyrǵan 71 eldi meken bar. Arnaıy jol kartasy aıasynda iske asyrylǵan sharalar nátıjesinde, 15 eldi mekende qaýip tolyǵymen joıylsa, 46-synda barynsha azaıtyldy.
«Departamentiniń daǵdarys ortalyǵynda sý tasqyny kezeńinde táýlik boıy jumys isteıtin shtab quryldy. Qutqarýshylar úılerdi aralap, turǵyndarǵa sý basý qaýpi tóngen jaǵdaıda ne isteý kerektigin túsindirýde», - delingen habarlamada.
