ShQO-da koronavırýs juqtyrǵan naýqastar týraly aıtyldy

ÓSKEMEN. QazAqparat – Shyǵys Qazaqstan oblysynda sońǵy úsh kúnde 3 adam koronavırýs juqtyrǵan. Onyń ishinde eki jasóspirim bar, dep habarlaıdy QazAqparat.

Búgin Semeıde 2007 jyly týǵan taǵy bir oqýshyda koronavırýs anyqtalǵan bolatyn. Ol – buǵan deıin osy dıagnozben statsıonarǵa túsken 2006 jylǵy naýqastyń inisi. Qazirde ınfektsııalyq statsıonarda jatqan naýqastyń jaǵdaıy ortasha. Osymen aımaq boıynsha juqpaly indetke shaldyqqandar sany 6 adamǵa jetip otyr.

Oblys ákimdigi turǵyndardyń úıde bolýlaryn, qajetsiz syrtqa shyqpaýlaryn suraıdy. Ásirese balalardyń qaýipsizdigin qamtamasyz etip, kóshede jáne úıde jeke bas gıgıenasyn qatań saqtaý qajet.

Qazirde Óskemen men Semeı qalalarynda qosymsha shekteýler engizilgen. Osynyń nátıjesinde kólik aǵyny men dalada júrgen turǵyndar sany 50% deıin azaıdy.

«Álem boıynsha koronavırýske qarsy vaktsına áli tabylǵan joq. Ózin-ózi oqshaýlaý jáne úıde bolý COVID-19 vırýsyn juqtyrmaýdyń jalǵyz tıimdi ádisi bolyp otyr», - dedi aımaq basshysy Danıal Ahmetov.