Jańalyqtar  >
  Qoǵam
ShQO-da qańǵyǵan ıt-mysyqtardy aýlaýǵa 150 mln teńge bólindi
2022 jylǵy 12 tamyz 04:34

ShQO-da qańǵyǵan ıt-mysyqtardy aýlaýǵa 150 mln teńge bólindi

ÓSKEMEN. QazAqparat – Shyǵys Qazaqstan oblysyndaǵy aýdandarda ıesiz janýarlar panalaıtyn oryndar ashylady, dep habarlaıdy QazAqparat tilshisi.

2022 jyly óńirde qańǵyǵan ıt-mysyqtardy aýlaýǵa 150 mln teńge bólindi. Bul týraly ShQO Óńirlik kommýnıkatsııalar qyzmetinde ótken baspasóz máslıhaty barysynda oblystyq aýyl sharýashylyǵy basqarmasynyń epızootııaǵa qarsy is-sharalar bóliminiń basshysy Melıs Qaınýldaev aıtty.

– 1 naýryzdan bastap úı janýarlaryn óltirýge tyıym salatyn jáne olardy ýaqytsha ustaý, vaktsınatsııalaý, zararsyzdandyrý jáne tabıǵı ortasyna jiberýge qatysty «Janýarlarǵa jaýapkershilikpen qaraý týraly» jańa zań kúshine endi. Búginde Shyǵys Qazaqstan aýmaǵynda janýarlardy aýlaý jáne ýaqytsha ustaý erejeleri ázirlendi. Endi ol oblystyq máslıhatqa usynylady, - deli ol.

Jańa zańdy júzege asyrý maqsatynda ıesiz janýarlardy ýaqytsha ustaýǵa arnalǵan torlar ornatylyp, aýdandarda ýaqytsha ustaý pýnktterin qurý jumystary júrgizilýde. Mundaı pýnktter Tarbaǵataı aýdany men Rıdder qalasynda qazirdiń ózinde bar.

«Qazirgi ýaqytta barlyq aýdan, qala ákimdikterine janýarlardy ýaqytsha ustaýǵa arnalǵan pýnktterdiń jobalyq-smetalyq qujattaryn ázirleý tapsyryldy. Sondaı-aq osy maqsatqa qosymsha qarajat bólý máseleleri qarastyrylýda. Erejege sáıkes, barlyq úı janýarlaryn tirkeý 2023 jyldyń 1 qyrkúıeginen bastap uıymdastyrylady», - dedi Melıs Qaınuldaev.

Onyń aıtýynsha, jyl basynan beri oblysta 16 380 ıt pen 1017 mysyq aýlanǵan.


Seriktester jańalyqtary

Jańalyqtar

Úrdis

MURAǴAT