Jańalyqtar  >

ShQO-da 5 adam mingen kólikti qar kóshkini basyp qaldy

2022 jylǵy 30 qarasha, 18:49
ShQO-da 5 adam mingen kólikti qar kóshkini basyp qaldy

ÓSKEMEN. QazAqparat – Shyǵys Qazaqstan oblysynda 5 adam mingen kólikti qar kóshkini basyp qaldy, dep habarlaıdy QazAqparat Polisia.kz saıtyna silteme jasap.

«Boran kezinde erli-zaıypty úsh jolaýshymen birge kólikpen Óskemennen Altaı qalasyna shyqqan. Tańǵy saǵat 05:00-de Óskemen – Rahman qaınarlary tasjolynyń serpantıninde kólikti qar kóshkini basyp qaldy», - delingen málimette.

Bul kúni Serebrıansk qalasy polıtsııa bóliminiń bastyǵy Qaırat Sultanǵalıev, Serebrıansk qalasy polıtsııa bóliminiń bastyǵy Ernur Makılenov, Altaı aýdany polıtsııa bólimi JTI memlekettik avtoınspektory Orynbasar Turǵanov joldy patrýldeýge shyqqan.

Tártip saqshylary qar basqan kólikti kórip, kómekke barǵan.

«Aldymen polıtsııa qyzmetkerleri kólikti kúrekpen qazyp alyp shyǵýǵa tyrysqan. Alaıda nátıje bolmaǵan. ÝAZ avtokóligimen súıreý de nátıje bermegen. Sondyqtan qyzmetkerler kómekke greıder traktoryn ákelgen. Onyń kómegimen avtokólikti qar qursaýynan shyǵarý múmkin boldy», - delingen polıtsııa habarlamasynda.

Altaı qalasyna jolǵa shyqqan úsh jolaýshyny polıtseıler jolshybaı kólikterge otyrǵyzyp jibergen. Al Óskemen qalasyna joldyń jabyq bolýyna baılanysty erli-zaıypty Serebrıansk qalasynda qaldy. Olarǵa quqyq qorǵaý organdarynyń qyzmetkerleri ystyq shaı men túski as berip, kólikti jóndeý úshin qonaq úıge ornalastyrǵan.


Foto: polisia.kz

Uqsas jańalyqtar
Seriktester jańalyqtary

Jańalyqtar