Jańalyqtar  >
  Qylmys

Sheteldik kólikterdi zańsyz tirkeıtin qylmystyq top bıýdjetke 1 mlrd teńgege zalal keltirgen

2022 jylǵy 9 jeltoqsan, 09:40
Sheteldik kólikterdi zańsyz tirkeıtin qylmystyq top bıýdjetke 1 mlrd teńgege zalal keltirgen

ASTANA. QazAqparat - Shetelden ákelingen avtokólikterdi tirkeýdi zańsyz júrgizgen qylmystyq top ustaldy, dep habarlaıdy QazAqparat Sybaılas jemqorlyq agenttigine silteme jasap.

Qylmystyq toptyń quramyna «Azamattarǵa arnalǵan úkimet» KEAQ qyzmetkerleri men azamattyq tulǵalardan turatyn adamdar kirgen.

«Qylmystyq top osy jyldyń qańtar aıynan bastap azamattardy sheteldik avtokólikterdi esepke qoıýdyń zańdylyǵyna qatysty aldaý arqyly óz qyzmetterin usyna otyryp, olardyń aqshalaı qarajatyn urlap, 486 kólik quralyn zańsyz tirkegeni anyqtaldy. Árbir avtokólik úshin zańsyz qyzmettiń quny 400 myń teńgeden 1,6 mln teńgege deıin bolǵan. Qajetti aqshany alǵannan keıin kúdiktiler avtokólikterdi satyp alý-satý mámileleriniń jazbasha formasyn, memlekettik nómirler men kólik quraldaryn tirkeý týraly kýálikterdi daıyndaǵany úshin memlekettik baj tólengeni týraly túbirtekterdi qoldan jasaǵan. UQT qyzmeti, onyń ishinde ishki ister organdarynyń memlekettik avtoınspektorlarynyń «Web-modýl» servıstik ortalyǵy» aqparattyq júıesinde buryn kádege jaratylǵan avtomashınalar týraly málimetterdi qasaqana zańsyz joıýy jáne olardyń ornyna jańadan ákelingen avtomobılderdiń málimetterin engizý saldarynan júzege asqan. Sottyń sanktsııasymen tórt polıtsııa qyzmetkeri qamaýǵa alyndy», - delingen Agenttik habarlamasynda.

Memlekettik bajdar men tólemderdi tóleýge arnalǵan azamattardyń aqshalaı qarajatyn kúdiktiler urlap, jeke qajettilikterine jumsady.

Atalǵan adamdardyń qylmystyq áreketi nátıjesinde azamattar men memleketke 1 mlrd teńgege tólenbegen memlekettik bajdar men alymdar túrinde zalal keltirildi. Búgingi kúni is boıynsha qylmystyq toptyń taǵy 4 belsendi qatysýshysy, onyń ishinde Astana qalasy boıynsha №2 Arnaıy HQKO basshysy ustalǵan.

Tergeý jalǵasýda.


Uqsas jańalyqtar
Seriktester jańalyqtary

Jańalyqtar