Jańalyqtar  >

«Shertpe kúı» respýblıkalyq dástúrli baıqaýynyń jeńimpazdary marapattaldy

2022 jylǵy 4 jeltoqsan, 18:31
«Shertpe kúı» respýblıkalyq dástúrli baıqaýynyń jeńimpazdary marapattaldy

ASTANA. QazAqparat – Almatyda «Shertpe kúı» respýblıkalyq dástúrli mýzyka baıqaýynyń jeńimpazdary marapattaldy, dep habarlaıdy QazAqparat Mádenıet jáne sport mınıstrliginiń baspasóz qyzmetine silteme jasap.

Jarystyń basty maqsaty – daryndy jas dombyrashylardy anyqtaý, olardyń kásibı sheberligin arttyrý, sondaı-aq ulttyq mádenıetti damytý. Birneshe kúnge sozylǵan festıvalde 16 men 35 jas aralyǵyndaǵy 45 kúıshi baq synady.

«Qazaqtyń shertpe kúıi – ulttyq mýzykamyzdyń eń qunarly qazynasy. Onyń tarıhy, dástúri sonaý kóne zamandardan bastaý alady. Jalpy, qazir dástúrli kúı men dombyranyń nasıhaty, oǵan degen qyzyǵýshylyq jyl sanap artyp keledi. Mysaly, búgingi tańda tek «Artsport» baǵdarlamasy sheńberinde 643 dombyra úıirmesi jumys isteıdi, oǵan 26 myńnan astam bala qatysyp jatyr. Bul kúı ónerine degen erekshe yqylasty kórsetse kerek. Sol sııaqty arnaıy mýzykalyq mektepterde, orta jáne joǵary oqý oryndarynda dombyra úırenýshiler jyldan-jylǵa kóbeıip keledi. Biz ári qaraı da qazaqtyń ulttyq dástúrli mýzyka ónerin damytýǵa baǵyttalǵan ıgi is-sharalardy jalǵastyra beremiz», - dep atap ótti Dáýren Abaev marapattaý saltanatynda.

Sonymen, baıqaý nátıjesi boıynsha Madııar Súleımenov bas júlde ıegeri atanyp, 1 mıllıon teńge kólemindegi syıaqymen marapattaldy.

Al, festıvaldiń birinshi oryn ıegerleri – Nurǵalı Tólebı men Daryn Qudaıbergenov 750 myń teńgeden ıelense, ekinshi orynǵa Syrym Shonbaev pen Ardaq Eleýsiz jaıǵasty, olarǵa 500 myń teńge buıyrdy.

Úshinshi oryndy Tursynbek Іlııas, Beket Beksultan, Jarqynnur Erjanat ıelenip, árqaısysy 300 myń teńgeden aldy.

Al, Máýetbek Lýnara men Nurjan Іlııasov «Úmit» arnaıy dıplomymen marapattaldy. Jantý Dadabaev, Samatova Aıymgúl, Tileýbek Іnjý, Toqtarov Dastan, Talaphan Erbolat festıvaldiń dıplomanttary atanyp, arnaıy aqshalaı syıaqy ıelendi.

Buǵan deıin «Shertpe kúı» festıvaliniń fınaly Almatyda ótetini habarlanǵan bolatyn.

Seriktester jańalyqtary

Jańalyqtar