Shegirtkemen kúres sharalaryn memleket óz monopolııasyna alýy múmkin
2022 jylǵy 21 maýsym 15:53

Shegirtkemen kúres sharalaryn memleket óz monopolııasyna alýy múmkin

NUR-SULTAN. QazAqparat – Shegirtkemen kúres sharalary qaıtadan tutastaı memlekettiń quzyryna berilýi múmkin, dep habarlaıdy QazAqparat tilshisi.

QR Aýyl sharýashylyǵy mınıstrligi Agroónerkásiptik keshendegi memlekettik ınspektsııa komıtetiniń tóraǵasy Almabek Mars ortalyq kommýnıkatsııalar qyzmetinde ótken brıfıngide osyndaı málimet berdi.

«Keleshekte shegirtkemen kúres sharalaryna memlekettik monopolııa engizýdi josparlap otyrmyz. Sondaı-aq, memleket esebinen kúres júrgiziletin zııankesterdiń tizimi qaıta qaralýy múmkin. Mysaly, 2020 jylǵa deıin shalǵyn kóbelegi osy tizimde boldy da, oǵan qarsy dári jergilikti bıýdjetterdiń esebinen sebilip keldi. 2020 jyly shalǵyn kóbelegine qarsy dárileý jumystaryn sýbsıdııalaý týraly norma shyqty. Eki jyl ótip úlgermeı jatyp aýyl sharýashylyǵy taýaryn óndirýshiler men «Atameken» UKP burynǵy júıeni qaıtarýdy surap jatyr», – dedi ınspektsııa basshysy.

Sondaı-aq, ol qyryqqabat kóbeleginen keletin qaýiptiń kóbeıýi múmkin ekenin atap ótti.

«Osyǵan baılanysty ony da bıýdjet esebinen kúres júrgiziletin zııankester qataryna engizý josparda bar. Qazaqstanǵa jyl saıyn syrttan 25 myń tonna pestıtsıd ákelinedi. Sol pestıtsıdterdi qoldaný erejesin ózgertý usynylyp otyr. Pestıtsıd quıylǵan árbir kanıstraǵa QR-kod ornatylýy múmkin. Sonda olardyń jyljý baǵyttaryn baqylap otyrýǵa bolady. Bul pestıtsıd sapasynyń saqtalýyn jáne bosaǵan ydystyń ekologııalyq zııan keltirmeýin qamtamasyz etedi. Sondaı-aq, fıtosanıtarııalyq esepterdi tsıfrlandyrý qolǵa alynbaqshy», - dedi Almabek Mars.

Onyń aıtýynsha, bıyl shegirtkege qarsy kúreske 2,5 mlrd teńge jumsalady .


Uqsas jańalyqtar

Jańalyqtar

Úrdis

MURAǴAT