Sháýeshek qalasyndaǵy jurtty qyzyqtyrǵan «Syrnaı murajaıy» - Sheteldegi qazaq tildi BAQ-qa sholý
2021 jylǵy 14 qarasha 11:26

Sháýeshek qalasyndaǵy jurtty qyzyqtyrǵan «Syrnaı murajaıy» - Sheteldegi qazaq tildi BAQ-qa sholý

NUR-SULTAN. QazAqparat - «QazAqparat» HAA sheteldegi qazaq tilinde taraıtyn aqparat kózderine aptalyq sholýyn usynady.

Sháýeshek qalasyndaǵy jurtty qyzyqtyrǵan «Syrnaı murajaıy» - CNR

Qytaıdaǵy Sháýeshek qalasy shyǵys pen batys mádenıetiniń úılesimi toǵysqan ortalyq sanalady. Osy «Garmon mekeni» atalǵan Sháýeshek qalasyndaǵy «Syrnaı murajaıynda» aspaptyń túr-túri saqtalǵan, dep jazady Qytaılyq kazakcnr.com saıty .

«Іle Qazaq avtonomııaly oblysyna qaraıtyn, Shyǵys pen batys mádenıetiniń toǵysqan ortalyǵy sanalatyn Sháýeshek qalasynda qytaı, qazaq, uıǵyr, dońǵan, daǵur, orys sekildi ulttardan quralǵan 146 myń halyq turady. Sondyqtan bolsa kerek «Garmon mekeni» atalǵan Sháýeshek qalasynda ár ulttyń án-kúıi áýelep, mádenı ortasy bir-birimen toǵysyp, úndesip jatady. Al bul qalanyń turǵyndarynyń garmon aspabyna degen qurmeti men yqylasy aıyryqsha. Ár shańyraqtyń tórinde garmon aspabynyń ilinip turýy qalypty qubylys. Kópshilik bas qosqan toı-merekede nemese úıge qonaq kelgende bolsyn garmonnyń sazdy únin estısiz. Sonymen birge «Garmon mekeni» atalatyn qaladaǵy Syrnaı murajaıynyńda ataǵy alysqa jetip, bul aspaptyń osy meken úshin qanshalyqty mańyzdy bolǵanyn áıgileı túsedi. Atalǵan murajaıda ártúrli memleketterde jasalǵan, uqsamaǵan úlgidegi 900-den astam Garmon aspaby saqtalǵan. Tipten bazardan tabyla bermeıtin aspaptyń kóne nusqalary da kezdesedi. Bul Qytaıdaǵy qazirgi kúngi eń úlken «Syrnaı murajaıy» sanalady. Sondyqtan qalaǵa syrttan keletin qonaqtar osy mádenı ortalyqqa kelýge asyǵady», -dep jazady CNR saıty.

Eske sala keteıik, garmondy 1822 jyly nemis sheberi F. Býshman oılap tapqan. Bul aspap shyqqan boıda ónersúıer qaýym arasynda keńinen taralyp, tipten, ózge túrleri de paıda bola bastady. Onyń qolmen, aıaqpen jáne aýyzben tartylatyn túrleri bar ekeni belgili. Qazaq halqy oǵan ultymyzdyń ejelgi úrmeli mýzykalyq aspabymen dybystyq uqsastyǵyna baılanysty «syrnaı» degen ataý bergen. Budan basqa onyń ún shyǵarýy men akkompanementtik tonnyń kóptigine baılanysty akkordeon, baıan, garmon degen ataýlary da bar. Reseıde syrnaı XIX ǵasyrdyń basynda paıda bolsa, Qazaqstanda ol sol ǵasyrdyń ekinshi jartysynda tarady. Qazaqtyń halyq ánshileri Maıra, Nartaı, Shashýbaı, Qutbaı, t.b. garmonmen án salǵan.

Reseıden Mońǵolııa arqyly Qytaıǵa gaz qubyry tartylady - KAZNEWS

Reseıden Mońǵolııa arqyly Qytaıǵa 960,5 shaqyrym gaz qubyry tartylady, dep habarlaıdy Mońǵolııanyń Kaznews aqparattyq portaly.

«Mońǵolııa Premer-mınıstriniń orynbasary S.Amarsaıhan Úkimetiniń búgingi otyrysynda gaz qubyry jobasyn tanystyrdy. Joba boıynsha Hıagt-Súhbaatar-Zamyn Úúd-Ereenge deıin qubyr tartylady. Uzyndyǵy – 960,5 shaqyrym. Joba boıynsha gaz qubyrynyń qurylys jumystary 2024 jyly bastalady. Eki eldiń birlesken jumys toby bul jobanyń tehnıkalyq-ekonomıkalyq negizdemesi daıyndalyp jatqanyn aıtty», - dep jazdy Kaznews.

Tehranda «Atajurtym – Qazaqstan» atty kórme ótip jatyr - Fars

Iran astanasy Tehrannyń Zarna galereıasynda Qazaqstan respýblıkasy táýelsizdiginiń 30 jyldyǵyna arnalǵan «Atajurtym – Qazaqstan» atty kórme ótip jatyr, dep habarlaıdy Irannyń Parstoday aqparat agenttigi.

«Kórmede ulttyq kıimder, qolóner buıymdary, túskıizder men kilemsheler, kartınalar men kitaptar qoıylǵan. Kórmege Irannyń medıa ókilderi jáne ónerpazdarymen qosa, Qazaqstannyń Irandaǵy elshiliginiń keńesshisi Dúısebaı Dáýirbek qatysty. Kórme 6 kúnge sozylady. Uıymdastyrýshy – IIR Teleradıo birlestigi álemdik qyzmet torabyna qarasty Qazaq radıosynyń aýdarmashysy Omarhanova Gaýhar Jumaǵazyqyzy», - dep jazady Parstoday aqparat agenttigi.

Samarqand Ózbekstandaǵy tarıhı - mádenı eskertkishteri eń kóp aımaq - «ÓzA» aqparattyq agenttigi

Ózbekstanda 2264 tarıhı - mádenı sáýlet eskertkishteri bar. Samarqand eldegi mádenı eskertkishteri eń kóp aımaq bolyp tabylady, dep jazady Ózbekstannyń «ÓzA» memlekettik aqparattyq agenttigi.

«Memlekettik statıstıka komıtetiniń habarlaýynsha, 2021 jyldyń 1 qańtaryndaǵy jaǵdaı boıynsha Ózbekstandaǵy sáýlet eskertkishteriniń sany 2264-ti quraǵan. Osy derekke saı, respýblıkanyń ár bir aımaǵynda qansha sáýlet eskertkishteri bar ekeni týraly málimet jarııalandy. Onda Samarqand oblysynda 562, Buhara oblysynda 507, Tashkent qalasynda 288, Qashqadarııa oblysynda 208, Ferǵana oblysynda 139 sáýlet eskertkishteri bar...», - dep jazady «ÓzA» aqparattyq agenttigi.

2022 jyly Baıan-Ólgeıge bıýdjetten 56,9 mıllıard tógróg qarjy bólindi - KAZNEWS

Mońǵolııa Parlamentiniń kezekti sessııasynda eldiń 2022 jylǵa arnalǵan bıýdjeti, Áleýmettik saqtandyrý qory men medıtsınalyq saqtandyrý qory, Bolashaq mura qorynyń 2022 jylǵa arnalǵan bıýdjeti týraly zań jobasy talqylanyp, bekitildi, dep habarlaıdy Mońǵolııanyń Kaznews aqparattyq portaly.

«Mońǵolııa Parlamentiniń depýtaty Áýbákir Tileýhanulynyń baspasóz qyzmeti habarlaǵandaı, 2022 jyly Baıan-Ólgeı aımaǵyna memlekettik bıýdjetten 56,9 mıllıard tógróg qarjy bólingen. Bul qarjy mektep, jataqhana, sport zal, balabaqsha, mádenıet ortalyqtaryn jáne ózge nysandardy salýǵa, tehnıkalyq qural jabdyqtar alýǵa jumsalady», - dep jazdy Kaznews.

Qazaqstanda Atatúrikti eske aldy - TRT

Túrkııa Respýblıkasynyń negizin qalaýshy Ǵazı Mustafa Kemal Atatúrik dúnıeden ótkenine 83 jyl tolýyna oraı Qazaqstannyń astanasy Nur-Sultanda saltanatty sharamen eske alyndy, dep habarlaıdy Túrkııa Radıo Televızııa portaly.

«Eske alý sharasy Nur-Sultandaǵy Atatúrik saıabaǵyndaǵy Atatúrik eskertkishi aldynda ótti. Túrkııanyń Qazaqstandaǵy ókiletti elshisi Ýfýk Ekıdjı: «Bul eske alý rásimin atamekenimiz Nur-Sultanda, elimizden alys geografııada ótkizý - biz úshin qurmet jáne maqtanysh. Bul kún biz úshin tek eske alý kúni retinde ǵana emes, Ǵazı Mustafa Kemal Atatúrik amanat etip qaldyrǵan respýblıkany, respýblıkanyń qundylyqtaryn, murattaryn jáne jaýapkershilikterin eske alý maǵynasynda da maqtanysh qaınary» dedi. Túrkııanyń Qazaqstandaǵy elshiligi uıymdastyrǵan saltanatty sharaǵa Qazaqstandaǵy túrik mekemeleriniń ókilderi men Nur-Sultanda turatyn túrik azamattary qatysty. Saltanatty shara Atatúrik eskertkishine gúl shoqtaryn qoıýmen aıaqtaldy», -dep jazady TRT.



Avtor:
Tilshi

Jańalyqtar

MURAǴAT