Shattyq Ótebalıeva: Myqty urpaq – el erteńiniń kepili
2022 jylǵy 23 qańtar 17:38

Shattyq Ótebalıeva: Myqty urpaq – el erteńiniń kepili

ORAL. QazAqparat – Qazaqstan Prezıdenti Qasym-Jomart Toqaev Parlament Májilisinde sóılegen sózinde elimizdiń aldynda turǵan basty mindetterdi atap kórsetken bolatyn. Osyǵan oraı Oral qalasy bilim bólimi mektepten tys jumys ortalyǵy dırektorynyń orynbasary, oblystyq máslıhat depýtaty Shattyq Ótebalıeva QazAqparat tilshisine suhbat berdi.

Onyń aıtýynsha, halqy bar, tili bar Otan qashanda baqytty.

-Shattyq Samatqyzy, Qazaq eliniń odan ári alǵa basýy úshin ne isteý kerek dep oılaısyń?

-Bul rette aldymen aıtarym, halqymyz barda qandaı qıyn kezeńnen de aman ótemiz dep oılaımyn. Osy oraıda ataqty aqynymyz Muqaǵalı Maqataevtyń halyq, til jáne Otan týraly tolǵaǵan áıgili óleńi eske túsedi.

Búgingi jaǵdaı qoǵamda bardy baǵalaý, qadirleý, shúkirlik etý kerektigin taǵy bir qaperlegendeı. Otany bar biz baqyttymyz. Kishi otanymyz – otbasymyz, úlken Otanymyz – Qazaqstannyń erteńgi kúni Kúnniń nuryndaı jaryq, sáýleli bolsyn!

Otannyń erteńi myqty bolýy úshin rýhy bıik, adamgershiligi mol bilimdi urpaq tárbıeleýimiz qajet. Myqty urpaq – el erteńiniń kepili.

-Jetkinshek urpaqty tárbıeleı bilý de mańyzdy deısiń ǵoı?

-Iá, el erteńin bılikke ǵana júktep qoıý durys emes. Árqaısysymyz jan-jaqqa tartpaı, bir-birimizge siltemeı, qoǵam bolyp uıysyp, birlese jumystanýymyz kerek. Ana sútimen beriletin tildi, dindi úıretý otbasynan bastalady. Memleketke tirek bolatyn tulǵa tárbıeleý úshin meıirimdi ata-ana, rýhanı qundylyqqa baı ustaz, shynaıy dos, adal jar, ádil basshy, myqty áriptes kerek. Sondaı jandarmen ómirde jolymyz túıisse nemese sol mártebege ıe bolsaq, urpaq tárbıesine úles qosa bilsek, baqyttymyz. Sebebi sondaı jandardyń qoldaýymen, qanatty sózimen, tálim-tárbıesimen ómir aǵysyna tez beıimdelip, erkin qanat qaǵatyn rýhy myqty tulǵa ósip shyǵady.

-Jańa Qazaqstandy qurýdaǵy ortaq maqsat jolynda birigý kerek ekendigi aıdaı anyq aqıqat emes pe?

-El basqarý isinde saıasat pen rýhanııat tepe-teńdigin saqtaý úshin ár salanyń mamandary jumyla jumys jasaýy qajet. Men de pedagog, «Nur Otan» partııasynan saılanǵan depýtat retinde jańa Qazaqstannyń qalyptasýy jolynda el erteńi – jas urpaqty tárbıeleýge óz úlesimdi qossam deımin. Dál osy ýaqytqa deıin de az jumys jasalǵan joq.

Oralda qanshama mektep janyndaǵy qosymsha bilim berý úıirmeleri ashylyp, jumys isteýde. Bul úıirmeler balalardyń bilim kókjıegin keńeıtip, ónerlerin shyńdap, bolashaqta myqty maman bolýǵa baǵyttaýda. Sonymen qatar qazaqtyń qolónerine qyzyǵýshylyqtaryn oıatyp, ulttyq salt-dástúrdi úıirme arqyly bala sanasyna sińirtýde.

Salaýatty ómir saltyn nasıhattaý, ıntellektýaldylyqty damytý, óner men sportqa baýlý, bos ýaqytty tıimdi ótkizý baǵytynda pedagogtarǵa, balalarǵa barynsha jaǵdaı jasalyp otyr. Degenmen áli de jetispeıtin tustarymyz barshylyq.

Balalardyń talǵamy óte joǵary, soǵan saı jumystaný kerekpiz. Sheteldiń juldyzdaryn emes, qazaqtyń tarıhyn, batyrlaryn, aqyn-jazýshylaryn, zııalylaryn, janymyzda júrgen myqtylaryn baǵalap, úlgi tutý mańyzdy.

Qoryta aıtqanda, keń baıtaq jerimizdi qorǵaı alatyn, qasıetti oryndaryn qasterleıtin, elim, jerim, týym deıtin jastardy tárbıeleı bilýge tıistimiz.

-Áńgimeńe rahmet!


Jańalyqtar

MURAǴAT