Sharýalar múddesin qorǵaý úshin kıiktiń sanyn retteý qajet – BQO ákimi
2022 jylǵy 5 mamyr 17:21

Sharýalar múddesin qorǵaý úshin kıiktiń sanyn retteý qajet – BQO ákimi

ORAL. QazAqparat – Batys Qazaqstan oblysynda kıik sanyn retteý máselesi qarastyrylady. Oblys ákimi Ǵalı Esqalıevtiń jýrnalıstermen kezdesýinde málim etkenindeı, óńirde kıikter jyl saıyn kóbeıip keledi, dep habarlaıdy QazAqparat tilshisi.

Ákimniń aıtýynsha, keıingi jyldary turǵyndar men sharýalardan kıikterdiń jaıylymdy otap ketkeni jóninde túsetin shaǵym jıilep barady.

«Jýyrda óńirge jumys sapary kezinde Premer-Mınıstr Álıhan Smaıylov Ekologııa mınıstrligine kıikke baılanysty maýsymnyń 1-ine deıin naqty sheshimge kelýdi júktedi. Sodan keıin Úkimet qaýlysy ma, mınıstrlik buıryǵy ma, shyǵatyn bolady. Sebebi, sharýalardyń múddesin qorǵaý kerek. «Bókeıorda» rezervatyna baılanysty aıtarym, bul máseleni túbegeıli sheshpeıdi. Rezervatqa beriletin jer aýmaǵynan uńǵymalar qazyp, zerttegen kezde sý shyqqan joq. Al, sý joq jerge kıik turaqtamaıdy. Árıne, Úkimet qaýlysyna sáıkes rezervat qurylyp, ınspektorlar men tehnıkalar sany kóbeıtiler. Alaıda, bul máseleni sheshýge ishinara ǵana septik etedi. Sondyqtan, kári tekelerdi azaıtyp degendeı, kıikter sanyn retteý qajet»

, - dedi Ǵalı Esqalıev.

Qazaqstanda kıikterdi atýǵa 2015 jyldan bastap tyıym salynǵan bolatyn. Keıin bul merzim 2023 jylǵa deıin uzartyldy. Sol kezde kıik sany 10-15 myńdaı edi, qazir 500 myńnan asyp ketti. Bıylǵy sanaq qorytyndysy boıynsha odan da kóbeıýi múmkin.

Eske sala keteıik, budan buryn Qazaqstanda kıikterdiń sany ósip kele jatqanyn jazǵan bolatynbyz. QR Ekologııa, geologııa jáne tabıǵı resýrstar mınıstri Serikqalı Brekeshev boljam boıynsha bir ǵana Batys Qazaqstan oblysynda kıikterdiń sany 1 mıllıonǵa deıin artýy múmkin ekendigin aıtqan edi.


Uqsas jańalyqtar
Seriktester jańalyqtary

Jańalyqtar

Úrdis

MURAǴAT