+7 (701) 759 90 19
USD 425.48 EUR 494.2
RUB 6.14 CNY 66.67
Jańalyqtar

Serik Erýbaev jolaýshylar tasymaldaý salasyndaǵy kemshilikterdi aıtty

2021 jylǵy 22 qyrkúıek 13:11
Bólisińiz:
Serik Erýbaev jolaýshylar tasymaldaý salasyndaǵy kemshilikterdi aıtty

NUR-SULTAN. QazAqparat – Parlament Májilisiniń jalpy otyrysynda depýtat avtobýs parkterindegi jaǵdaıǵa baılanysty Úkimetke saýal joldady, dep habarlaıdy QazAqparat tilshisi.

«2021 jylǵy 14 sáýirde «Aq jol» partııasynyń parlamenttik fraktsııasy elimizde avtobýs tasymalyndaǵy kúrdeli jaǵdaıdy saýyqtyrý, sonyń ishinde jumys istep turǵan avtoparkterge tıesili sýbsıdııalardy tóleý boıynsha shuǵyl shara qabyldaý jóninde Úkimetke depýtattyq saýal joldaǵan bolatynbyz. Elimizdiń ár óńirinen túsip jatqan ótinishterine oraı, sondaı-aq atalǵan másele boıynsha saılaýshylarmen kezdesý barysynda jolaýshylar tasymaldaý salasynda jaǵdaıdyń ózgermegenine kózimiz jetip, máseleni qaıta kóterýge májbúr bolyp otyrmyz. Tyǵyryqqa tirelip, bankrottyqqa ushyraýdyń aldynda turǵan tasymaldaýshylar birneshe qalalarda ereýilge de shyǵyp úlgerdi, bundaı aqparat Aqtobe, Shymkent, Petropavl qalalarynan túsýde. Óıtkeni, jergilikti atqarýshy organdar bekitken tarıfter saldarynan, sýbsıdııasyz avtobýs júrgizýshilerine jalaqy tóleı almaýy, onyń ústine satyp alynǵan jańa avtobýstarǵa lızıng boıynsha memleket tarapynan tıesili qarajattyń tólenbeýi jyǵylǵannyń ústine judyryq bolýda», - dedi S. Erýbaev Premer-Mınıstrdiń birinshi orynbasary Álıhan Smaıylovtyń atyna joldaǵan depýtattyq saýalynda.
Onyń aıtýynsha, Semeı qalasyndaǵy eki jyl boıy qyzmetin sátti atqaryp kelgen avtopark, qajetti qarajat almaǵandyqtan, sottyń sheshimimen bankrot bolyp jarııalanyp, nesıege alǵan tehnıkasy túsiniksiz jolmen basqa merdigerge berilgen.
«Eń qyzyǵy, atalǵan avtoparkke eki jyl boıy tólenbegen sýbsıdııalardy jańa merdigerge qala basshylary bir sátte 520 mln teńge mólsherinde berilgen. Bul qarajat qaıdan shyqty? Bıýdjette jańa merdigerge arnaıy saqtalyp otyrǵan ba? Árıne, biz bankrottyqqa ushyraǵan avtoparkti aqtaǵymyz kelmeıdi, sottyń sheshimi boıynsha onyń da kinási bar shyǵar. Al biraq bundaı tájirıbe keń taralsa, basqa da qalalarda qoldaýsyz qalǵan avtoparkterdiń taǵdyry alańdatady», - dedi depýtat.
«2018-2020 jyldary respýblıkalyq jáne jergilikti bıýdjetten bólingen qarajattyń qanshasy tikeleı avtobýs parkterine jetkendigi, al qanshasy áli kúnge deıin ákimdiktiń qorynda ıgerýsiz jatqany týraly, sondaı-aq 2022-2024 jyldarǵa arnalǵan bıýdjette osy baǵytta qansha qarajat qarastyrylatyndyǵy jóninde málimet berýdi suraımyz. Sonymen qatar, qarastyrylǵan qarajat tıisti mekemelerge jetkizbegeniniń nátıjesinde, avtoparkter bankrottyqqa ushyraǵan jaǵdaıda jaýapkershilikti kimnen suraý kerek?», - dedi ol.


Bizdiń kanalymyzǵa jazylyńyz:

#Parlament   #Jol   #Májilis  
Bólisińiz:

Avtor:

Rýslan Ǵabbasov

Sondaı-aq... oqyńyz
Pikir qaldyrý
+7
Jiberý
ONLAIN QYZMETKERLER

MURAǴAT