Jańalyqtar  >

Senatta sýarmaly eginshilik problemasy kóterildi

2022 jylǵy 29 qyrkúıek, 13:13
Senatta sýarmaly eginshilik problemasy kóterildi

ASTANA. QazAqparat - Senator Rysqalı Ábdikerov elimizde sýarmaly eginshilikti damytý deńgeıiniń tómendigine alańdaýshylyq bildirdi. Ol Úkimet basshysy Álıhan Smaıylovtyń atyna joldaǵan depýtattyq saýalynda saladaǵy problemalardy atap ótti, dep jazdy QazAqparat tilshisi.

Senatordyń aıtýynsha, 1990-jyldary álemde balamasy joq Qanysh Sátpaev atyndaǵy arna aýmaǵyndaǵy sýarmaly egistik alqaby 80 myń gektar bolsa, qazirgi ýaqytta tek 13 myń gektar qalǵan. Bul turǵyda qolda bar qýattardyń tek 10 paıyzy ǵana paıdalanylady.

«Eń qyzyǵy, elimizdiń ońtústiginde sýarmaly eginshilikpen aınalysý úshin sý jetkiliksiz bolyp jatsa, Ortalyq Qazaqstanda sý bar, biraq, tolyq paıdalanbaı otyrmyz. Sonymen birge, jekelegen óńirlerde jemis-kókónis ónimderin jasaqtaıtyn arnaıy qoıma ınfraqurylymy da jetkilikti deńgeıde damymaǵanyn atap ótken jón. Sondyqtan zań talaptaryna saı jer paıdalanýshylarǵa sýarmaly jerdiń qunarlylyǵy men ónimdiligin arttyrýǵa qatań talap qoıýmen birge, memleket tarapynan qoldaýdy da jan-jaqty kúsheıtý qajet», - dedi R. Ábdikerov.

Senator osyǵan baılanysty Qanysh Sátpaev atyndaǵy arnanyń qýatyn tolyq paıdalanýdy, Qaraǵandy oblysyndaǵy sýarmaly jerlerdi qalpyna keltirýdi, agrarshylarǵa sýbsıdııa men jeńildetilgen nesıe berýge múmkindik beretin sharalar qabyldaýdy usyndy.

«Shaǵyn fermerlerge sý únemdeý tehnologııalaryn satyp alýǵa jáne qurylysqa beriletin sýbsıdııa kólemin 50% ornyna 80%-ǵa deıin ulǵaıtý kerek. Sýarý júıelerin kúrdeli jóndeý jáne rekonstrýktsııalaýǵa, ásirese, sharýashylyqishilik kanaldar jáne kollektorlyq-drenajdyq júıelerdi jyl saıyn tazartýǵa qarajat qarastyrý qajet. Jemis-kókónis ónimderin saqtaıtyn arnaıy qoıma salýǵa kásipkerlerdi yntalandyrý úshin ınvestıtsııalyq sýbsıdııa men jeńildetilgen nesıe berý kerek. Sý mamandaryna erekshe eńbek jaǵdaıyn jasap, aýyldyq jerde jumys istegeni úshin qosymsha ústemeaqylar qarastyrýdy, sondaı-aq olardyń daıyndyǵy men tájirıbelerin arttyrý mańyzdy dep sanaımyn», - dep atap ótti depýtat.


Tegı:
Uqsas jańalyqtar
Seriktester jańalyqtary

Jańalyqtar