+7 (701) 759 90 19
USD 425.37 EUR 492.66
RUB 5.97 CNY 66.15
Jańalyqtar

Senatta azamattyq qoǵam men medıasalany damytý máseleleri talqylandy

2021 jylǵy 21 qyrkúıek 18:35
Bólisińiz:
Senatta azamattyq qoǵam men medıasalany damytý máseleleri talqylandy

NUR-SULTAN. QazAqparat - Senat Tóraǵasy Máýlen Áshimbaevtyń qatysýymen Palata janyndaǵy Jas sarapshylar klýbynyń kezekti otyrysy ótti. Altynshy ret uıymdastyrylyp otyrǵan otyrysta qatysýshylar azamattyq qoǵamnyń damý úrdisi men elimizdegi medıa salasynyń bolashaǵy týraly sóz qozǵady, dep habarlaıdy joǵarǵy palatanyń baspasóz qyzmeti.

Uqsas jańalyqtar
Túrkistanda úkimettik emes uıymdardyń ortalyǵy ashyldy Senatorlar polıtsııanyń servıstik modelin keńeıtý máselelerin talqylady Nur Otan-nyń qoǵamdyq keńesterinde 9 myńnan asa másele qaraldy

Kezdesýge Qazaqstannyń Aqparat jáne qoǵamdyq damý mınıstri Aıda Balaeva, Klýb músheleri jáne arnaıy shaqyrylǵan sarapshylar qatysty.

Otyrysty ashqan Máýlen Áshimbaev Memleket Basshysy Qasym-Jomart Toqaevtyń azamattyq jáne saıası saladaǵy negizgi bastamasy «Halyq únine qulaq asatyn memleket» tujyrymdamasy ekenin atap ótti. Sondaı-aq osy tujyrymdama aıasynda bılik pen qoǵamnyń turaqty dıalogyn jolǵa qoıýǵa jáne memleketti basqarýǵa azamattyq qoǵamnyń qatysýyn arttyrýǵa arnalǵan júıeli reformalar qolǵa alynǵanyna nazar aýdardy.

Senat Spıkeri qazirgi tańda elimizde qoǵamdyq-saıası salada kezeń-kezeńimen júrgizilip jatqan reformalar jalǵasyp otyrǵanyn aıtty. Bul jumystarǵa el Prezıdentiniń Qazaqstan halqyna Joldaýynda aıtylǵan basymdyqtar tyń serpin berdi.

«Memleket basshysynyń bıylǵy Joldaýynda mańyzdy mindetter belgilendi. Birinshiden, Prezıdentimiz aýyldyq jerlerde azamattyq bastamalardy qoldaýdyń tıimdi tetigin ázirleýdi mindet etip qoıdy. Ekinshiden, Memleket basshysy depýtat mandatyn bólý kezinde áıelder men jastar úshin 30 paıyzdyq kvotany mindetti túrde eskerý týraly normany zańmen bekitýdi tapsyrdy. Úshinshiden, Prezıdentimiz, erekshe qajettiligi bar azamattarǵa da kvota belgileý kerektigin aıtty. Mundaı qadamdar halyqtyń ártúrli toptarynyń azamattyq quqyqtaryn eskeretin ınklıýzıvti qoǵam qurýǵa yqpal eteri sózsiz» , – dedi Senat Tóraǵasy.

Klýb otyrysynda talqylanǵan mańyzdy máselelerdiń biri medıa salasyna qatysty boldy. Máýlen Áshimbaev pandemııa kezeńinde medıakommýnıkatsııanyń erekshe ról atqarǵanyn tilge tıek etti.

«Pandemııa kezeńinde naqty málimetter men tekserilgen aqparattardyń tapshylyǵy baıqaldy. Sondyqtan adamdar aqparat kózderine muqııat mán berip, bedeldi medıalarǵa ǵana basymdyq berdi. Budan sapaly jańalyqtar taratatyn jýrnalıstıka paıda kórdi. Nátıjesinde, álemniń jetekshi aqparat quraldarynyń oqyrmandary kóbeıip qana qoımaı, olardyń aqyly jazylymdary da arta túsken» , – dedi Palata Tóraǵasy.

Sonymen qatar Máýlen Áshimbaevtyń aıtýynsha, mundaı úrdistiń keri áseri de baıqalǵan. Belgisizdik pen resmı aqparat kózderine degen senimsizdik feık-nıýsderdiń jáne ártúrli konspırologııalyq teorııalardyń kóbeıýine ákelip soqtyrǵan.

«Qazirgideı aqparattar aǵynynda adasyp qalmaý úshin adamǵa aq pen qarany ajyratatyn arnaıy bilim kerek. Bul rette jańa zaman adamy úshin medıasaýattylyqtyń mańyzy zor ekeni sózsiz. Menińshe, osy trendti eskerip, Qazaqstanda álemge ǵylymı kózqaras qalyptastyratyn salalyq jýrnalıstıkany damytýǵa jáne ǵylymdy dáripteıtin qoǵamdyq pikirdiń kóshbasshylaryn daıyndaýǵa kóńil bólgen jón. Bul medıa salasynyń sapasyn arttyrýǵa múmkindik beredi» , – dedi Máýlen Áshimbaev.

Jas sarapshylar klýbynyń basqosýynda qatysýshylar qoǵamdyq joba retinde Taldaý mektebin qurýdy usyndy. Máýlen Áshimbaev mundaı Mektepte tyńdaýshylar taldaý mátinderi men zertteý ádisnamasyn jazý sııaqty qoldanbaly tásilderdi, derekter bazasymen jumys isteýdi, memlekettik basqarýda, halyqaralyq qatynastar men dıplomatııada qoldanylatyn analıtıkalyq ádisterdi meńgerýge múmkindik alatynyn atap ótti. Dáris oqý jáne trenıngter ótkizý úshin belgili qazaqstandyq sarapshylar men zertteýshilerdi shaqyrý josparlanyp otyr.

«Shyn máninde, qazir kóp salada taldaý tásilderiniń álsiregeni baıqalady. Mundaı úrdis, ásirese, memlekettik basqarýda aıtarlyqtaı másele týdyryp otyr. Sebebi, bul saladaǵy sheshimder salmaqty taldaýlar men zertteýler negizinde qabyldanýy kerek. Ókinishke qaraı, qazir kóptegen sheshimder qalyptasqan jaǵdaıǵa baılanysty, týyndaǵan qıyndyqtarǵa jaýap retinde ǵana qabyldanady. Klýbtyń aldyńǵy otyrystarynyń birinde men mundaı jaǵdaı álemdegi gýmanıtarlyq bilimniń daǵdarysymen baılanysty ekenin aıtqan edim. Osy rette Klýb músheleriniń qoǵamdyq Taldaý mektebin qurý týraly usynysyn ózekti jáne ýaqtyly dep esepteımin. Aldaǵy ýaqytta elimizdegi jetekshi joǵary oqý oryndarynyń biriniń gýmanıtarlyq fakýltetimen yntymaqtasa jumys isteý múmkindigi qarastyrylýda. Osy rette Mektep jumysyna qoldaý kórsetýge daıyn ekenimdi de aıtqym keledi» , – dedi Máýlen Áshimbaev.

Otyrys barysynda qatysýshylar azamattyq qoǵamdy jáne medıasferany damytýǵa qatysty óz oılaryn bildirip, pikirlerimen bólisti. Saıasattaný salasyndaǵy PhD Juldyzaı Ysqaqova Qazaqstandaǵy saıası ınstıtýttarǵa degen qoǵamdyq senim dınamıkasynyń zertteý nátıjelerin jarııalady. Óz kezeginde quqyqtaný salasyndaǵy PhD Músilim Hasenov azamattardyń aqparat alý quqyqtarynyń iske asyrylýy jáne olardyń memleket isterin basqarýǵa qatysýy týraly sóz qozǵady. Saıası sholýshy Ǵazız Ábishev Qazaqstandaǵy blogosfera men áleýmettik jelilerdi zańnamalyq retteýge qatysty oıyn bildirdi. Eýrazııalyq ıntegratsııa ınstıtýtynyń sarapshysy Nıkıta Shatalov analıtıkalyq jýrnalıstıkany damytý jáne medıa naryqty retteýdiń jańa tásilderi týraly usynystaryn jetkizdi.

Otyrysty qorytyndylaǵan Máýlen Áshimbaev sarapshylar aıtqan usynystar men pikirler Parlament jumysynda eskeriletinin aıtyp, Aqparat jáne qoǵamdyq damý mınıstrliginiń de nazaryna alynatynyna senim bildirdi.


Bizdiń kanalymyzǵa jazylyńyz:

Bólisińiz:
Uqsas jańalyqtar
Sondaı-aq... oqyńyz
Pikir qaldyrý
+7
Jiberý
ONLAIN QYZMETKERLER
REDAKTOR
Janat Qapalbaeva
Janat Qapalbaeva
954-059

MURAǴAT