Senator: Ýtıl alymy fermerlerge jáne búkil aýyl sharýashylyǵyna zııan keltiredi
2022 jylǵy 20 qańtar 11:40

Senator: Ýtıl alymy fermerlerge jáne búkil aýyl sharýashylyǵyna zııan keltiredi

NUR-SULTAN. QazAqparat – Búgin Senattyń jalpy otyrysynda depýtat Muhtar Jumaǵazıev elimizdiń Premer-mınıstri Álıhan Smaıylovtyń atyna saýal joldap, kádege jaratý jınaǵy alymyna qatysty birqatar problemalardy atady, dep habarlaıdy QazAqparat tilshisi.

Ol saýalynda depýtattardyń óńirlerge sapary kezinde senatorlarǵa kádege jaratý alymynyń joǵary mólsherine baılanysty azamattardan birneshe ret shaǵym túskenin atap ótti.

Senator jeńil kólikterdiń kádege jaratý alymynyń mólsheri 400 myń teńgeden 3,5 mln teńgege deıin, al júk kóligi men aýyl sharýashylyǵy tehnıkasyna 14 mln teńgege jetetinin aıtty.

Bul shetelden ımporttalatyn, sondaı-aq Qazaqstanda óndiriletin aýyl sharýashylyǵy tehnıkasynyń aıtarlyqtaı qymbattaýyna alyp keldi.

«Kádege jaratý alymy is júzinde aýyl sharýashylyǵy eńbekkerlerine qosymsha salyqqa aınaldy. Tehnıkany ákelý kezinde fermerge tehnıka qunynyń 25-30 paıyzyna teń somada bastapqy jarnany jáne kádege jaratý alymyn tóleýge týra keledi. Máselen, traktorlar boıynsha ortasha alym mólsherlemesi 11 mln teńgege deıin, al kombaındar boıynsha ár danasyna 22 mln teńgege deıin jetedi, bul aýyl sharýashylyǵy taýaryn óndirýshilerge qosymsha qarjy júktemesi bolyp otyr», - dedi Jumaǵazıev.

Fermerlerge ózekti bolyp otyrǵan taǵy bir másele – eski tehnıkany kádege jaratý úshin jeńildik sertıfıkatynyń mólsheri.

Senator kombaındy kádege jaratý alymy 75-80 mln teńge baǵasymen 9 mln teńgeni quraıtynyn, al jeńildik sertıfıkatynyń mólsheri tek 2 mln teńgeni nemese tehnıka qunynyń 2,5 paıyzyn quraıtynyn aıtty.

Osyǵan baılanysty Muhtar Jumaǵazıev jeńildik sertıfıkatynyń kólemin ulǵaıtýdy usyndy.

«Aýyl sharýashylyǵynyń tehnıkasy 80 paıyzǵa deıin tozǵan jaǵdaıda kádege jaratý alymynyń qoldanystaǵy normalary otandyq fermerlerge jáne jalpy aýyl sharýashylyǵyna eleýli zalal keltiretini anyq. Nátıjesinde azyq-túlik ónimderi men olardy óndirýge tehnologııalyq qatysy bar taýarlar men qyzmetterge baǵa ósip barady», - dep atap ótti ol.

Senator qalyptasqan jaǵdaıǵa baılanysty qazaqstandyqtar is júzinde sapaly, zamanaýı avtomobılder men ónimdiligi joǵary aýyl sharýashylyǵy tehnıkasyna qol jetkizý múmkindiginen aıyryldy dep sanaıdy.

Depýtat Úkimet basshysyna kádege jaratý alymynyń mólsherin tómendetý, balamasynyń bolmaýyn eskere otyryp ekologııalyq ımporttyq aýyl sharýashylyǵy tehnıkasyna kádege jaratý alymyn alyp tastaý, júk kóligi men aýyl sharýashylyǵy tehnıkasy úshin kedendik bajdarǵa ýaqytsha moratorıı engizý máselelerin qaraýdy usyndy.


Jańalyqtar

MURAǴAT