FÝTBOLDAN ÁLEM ChEMPIONATY-2022
  Jańalyqtar  >

Senat «jasyl ekonomıka» modeline qatysty zań qabyldady

2022 jylǵy 6 qazan, 15:20
Senat «jasyl ekonomıka» modeline qatysty zań qabyldady

ASTANA. QazAqparat – Senat «Jahandyq jasyl ósý ınstıtýtyn qurý týraly kelisimdi ratıfıkatsııalaý týraly» Zań qabyldandy, dep habarlaıdy QazAqparat tilshisi.

«Memleket basshysy Qasym-Jomart Toqaevtyń Ońtústik Koreıaǵa saparynyń qorytyndysy boıynsha berilgen tapsyrmany oryndaý maqsatynda Jahandyq jasyl ósý ınstıtýtyna qosylý jónindegi zań jobasy ázirlendi. Qazirgi ýaqytta Qazaqstan Respýblıkasynda dekarbonızatsııalaý saıasaty aıasynda 2060 jylǵa deıingi kómirtekti beıtaraptyq strategııasy ázirlenip jatyr. Jańa ekologııalyq kodeks qabyldanyp, ónerkásip salalarynyń eń ozyq qoljetimdi tehnologııalarǵa kóshýi jónindegi reformaǵa jol ashyldy. Bul rette tıisti ınvestıtsııa tartylyp, tómen kómirtekti jobalar engiziledi degen sóz», - dedi QR Ekologııa, geologııa jáne tabıǵı resýrstar mınıstri Serikqalı Brekeshev Senattyń jalpy otyrysynda.

Osy oraıda ol Jahandyq jasyl ósý ınstıtýty damyǵan jáne damýshy ekonomıkasy bar elderge bul saladaǵy josparlar men saıasatty iske asyrýǵa járdemdesetini atap ótti.

«Instıtýttyń negizi 2010 jyly qalanǵan jáne negizgi qyzmeti «jasyl ósý» dep atalatyn ekonomıkalyq ósýdiń jańa modelin qoldaıtyn halyqaralyq ǵylymı-zertteý ortalyǵy bolyp otyr. Instıtýt uıymǵa múshe eldermen jáne seriktestermen Klımattyq maqsattarǵa qol jetkizýge baǵyttalǵan klımattyń ózgerýine qarsy is-qımyl josparlary men jobalaryn qoldaýǵa qarajat jumyldyrý úshin jumys isteıdi.

Instıtýt el úkimetterine Parıj kelisimi aıasynda qabyldanǵan «jasyl ósý» strategııalary men mindettemelerge qol jetkizý jónindegi Ulttyq josparlardy ázirleýde qoldaý kórsetedi», - dedi mınıstr.

Instıtýttyń qyzmeti kelesi negizgi qoldaý túrlerin qamtıdy: ekologııalyq áserdi baǵalaý, strategııa men josparlaýdy ázirleý, qarjylandyrýdy uıymdastyrý jáne jasyl jobalardy engizý, sondaı-aq bilim almasý.

Osy Kelisimdi ratıfıkatsııalaý qandaı da bir mindettemelerdi qabyldamaı, tehnıkalyq kómekti tartý múmkindigimen saraptamalyq áleýetke jáne Instıtýttyń jınaqtalǵan bilim bazasyna qol jetkizýge múmkindik beredi.

Senat tóraǵasy Máýlen Áshimbaev bul kelisim elimizde «jasyl ekonomıka» modelin engizý isin ilgeriletýdi kózdeıtinin aıtty.

«Qabyldanǵan zań Jahandyq jasyl ósý ınstıtýtynyń seriktes elderimen ekologııalyq tehnologııalardy damytý salasynda tájirıbe almasýǵa jol ashady. Sol arqyly Qazaqstandy teńgerimdi ári turaqty damytýǵa óz úlesin qosady dep senemiz», - dedi M. Áshimbaev.


Foto :firbid.com




Tegı:
Uqsas jańalyqtar
Seriktester jańalyqtary

Jańalyqtar