Senat Spıkeri Qytaı Halyqtyq saıası konsýltatıvtik keńesi Búkilqytaılyq komıtetiniń tóraǵasymen kezdesti
2022 jylǵy 21 mamyr 18:16

Senat Spıkeri Qytaı Halyqtyq saıası konsýltatıvtik keńesi Búkilqytaılyq komıtetiniń tóraǵasymen kezdesti

NUR-SULTAN. QazAqparat – Qazaqstan Qytaımen yntymaqtastyqty damytýǵa jáne túrli baǵyttaǵy ózara is-qımyldyń joǵary deńgeıin ári qaraı ilgeriletýge erekshe mán beredi. Bul týraly QR Parlamenti Senatynyń tóraǵasy Máýlen Áshimbaev Qytaı Halyqtyq saıası konsýltatıvtik keńesi Búkilqytaılyq komıtetiniń tóraǵasy Van ıAnmen kezdesýinde aıtty, dep habarlaıdy QazAqparat Palatanyń baspasóz qyzmetine silteme jasap.

Máýlen Áshimbaev el Prezıdenti Qasym-Jomart Toqaevtyń 2019 jyly Qytaıǵa jasaǵan saparyna nazar aýdardy. Ol óz sózinde sol sapar kezinde memleket basshylary Qazaqstan men Qytaı máńgilik, strategııalyq jáne jan-jaqty seriktestikti damytýǵa beıildi ekenin rastaıtyn Birlesken málimdemege qol qoıǵanyn aıtty.

«Bizdiń elderimizdiń memleket basshylary qol jetkizgen ýaǵdalastyqtardy iske asyrý barysynda Qazaqstan Parlamentiniń Senaty men Qytaıdyń Halyqtyq saıası konsýltatıvtik keńesi arasyndaǵy yntymaqtastyqtyń mańyzy zor. Bul bizdiń aldaǵy ózara is-qımylymyzdyń negizi bolýǵa tıis. Biz ekijaqty ózara tıimdi yntymaqtastyqtyń túrli baǵyttary boıynsha birlesken jumysqa daıynbyz», – dedi Senat Spıkeri.

Sonymen qatar, ol Parlament Senaty qytaılyq áriptesterimen ekijaqty sheshimderdi saraptamalyq turǵydan qoldaý, zańdardyń oryndalýyn baqylaý, sondaı-aq qoǵamdyq kelisimdi nyǵaıtý jáne dinaralyq dıalogty ilgeriletý salasynda tájirıbe almasýǵa daıyn ekenin tilge tıek etti.

Senat Tóraǵasy Memleket basshysynyń bastamasymen Qazaqstanda júrgizilip jatqan saıası reformalarǵa da toqtalyp ótti. Atap aıtqanda, kezdesýde Konstıtýtsııaǵa ózgerister men tolyqtyrýlar engizý jónindegi aldaǵy respýblıkalyq referendým jáne oǵan daıyndyq barysy týraly sóz boldy.

Óz kezeginde, Qytaı Halyqtyq saıası konsýltatıvtik keńesi Búkilqytaılyq komıtetiniń tóraǵasy Van ıAn Qazaqstanda júrgizilip jatqan reformalar jóninde oń pikirin bildirdi. Sondaı-aq, Qytaı túrli saladaǵy dostyq pen tatý kórshilik qaǵıdattary negizinde bizdiń elmen jan-jaqty ózara tıimdi yntymaqtastyqty jalǵastyrýǵa daıyn ekenin jetkizdi.

Kezdesý sońynda Máýlen Áshimbaev Van ıAnǵa mazmundy dıalog úshin alǵys aıtyp, ekijaqty yntymaqtastyqtyń odan ári keńeıe beretinine senim bildirdi.


Jańalyqtar

MURAǴAT