Senat depýtattaryn saılaý 2023 jylǵy 14 qańtarda ótedi
ASTANA. QazAqparat - Memleket basshysy Qazaqstan Respýblıkasy Parlamenti Senatynyń depýtattaryn saılaýdy 2023 jylǵy 14 qańtarǵa taǵaıyndaý týraly Jarlyqqa qol qoıdy, dep habarlaıdy Aqordanyń baspasóz qyzmeti.
«Qazaqstan Respýblıkasy Konstıtýtsııasynyń 44-babynyń 2) tarmaqshasyna, «Qazaqstan Respýblıkasyndaǵy saılaý týraly» 1995 jylǵy 28 qyrkúıektegi Qazaqstan Respýblıkasy Konstıtýtsııalyq zańynyń 69-babyna sáıkes Qazaqstan Respýblıkasy Parlamenti Senatynyń depýtattary ókilettikteriniń konstıtýtsııalyq merzimi 2023 jyly aıaqtalatynyna baılanysty QAÝLY ETEMІN:
1. Qazaqstan Respýblıkasy Parlamenti Senatynyń depýtattaryn saılaý 2023 jylǵy 14 qańtarǵa taǵaıyndalsyn.
2. Qazaqstan Respýblıkasynyń Úkimeti, Astana, Almaty jáne Shymkent qalalarynyń, oblystardyń ákimderi Qazaqstan Respýblıkasy Parlamenti Senatynyń depýtattaryn saılaýdy uıymdastyrýshylyq, materıaldyq-tehnıkalyq jáne qarjylyq qamtamasyz etý jóninde sharalar qabyldasyn.
3. Osy Jarlyq jarııalanǵan kúninen bastap qoldanysqa engiziledi» delingen Jarlyqta.
Aıta keteıik, buǵan deıin Prezıdent Senat depýtattaryn saılaý týraly Jarlyqqa qol qoıatynyn jazǵan edik.
Jańalyqtar
