Valıýta baǵamdary:
    usd/kzt 477.98 eur/kzt 488.93

    rub/kzt 7.93 cny/kzt 70.82
Aýa raıy:
Nur-Sultan: 1 °S
Almaty: 15 °S

Senat tsıfrlandyrýdy, aqparattyq qaýipsizdikti damytýǵa qatysty zań qabyldady

2022 jylǵy 28 maýsym 13:05

NUR-SULTAN. QazAqparat – Búgin Senattyń jalpy otyrysynda «Qazaqstan Respýblıkasynyń keıbir zańnamalyq aktilerine ınnovatsııalardy yntalandyrý, tsıfrlandyrýdy, aqparattyq qaýipsizdikti damytý jáne bilim berý máseleleri boıynsha ózgerister men tolyqtyrýlar engizý týraly» Zańy eki oqylymda qaralyp, qabyldandy, dep habarlaıdy QazAqparat tilshisi.

Qujat memlekettik basqarýdy tsıfrlyq transformatsııalaý, elektrondy qujattardy qoldaný aıasyn keńeıtý jáne derekterdi basqarý júıesin ınstıtýtsıonalızatsııalaý maqsatynda ázirlendi.

Zań odan ári tsıfrlandyrý jáne reınjınırıng arqyly memlekettik basqarýdy jetildirýge, sondaı-aq tsıfrlyq qujattar servısin qoldaný aıasyn keńeıtýge, elektrondy qujattardyń olardyń qaǵazdaǵy uqsastyqtarymen teń dárejeleligin qamtamasyz etýge baǵyttalǵan.

Senattyń Ekonomıkalyq saıasat, ınnovatsııalyq damý jáne kásipkerlik komıtetiniń málimetine qaraǵanda, azamattyq hal aktilerin (týýy, neke jáne t.b.) memlekettik tirkeý salasynda kýálikterdi elektrondy formatqa kóshirý bóliginde birqatar ózgerister men tolyqtyrýlar engiziledi. Máselen, azamattyq hal aktilerin memlekettik tirkeý týraly kýálik, anyqtama qaǵaz nusqada, sondaı-aq elektrondy tsıfrlyq qoltańba arqyly kýálandyrylatyn elektrondyq nysanda beriletin bolady.

«Baılanys týraly» Zań aıasynda baılanys operatory Qazaqstan Respýblıkasynyń radıojıilik spektrin paıdalanýǵa arnalǵan ruqsatta kórsetilgen eldi mekender men aýmaqtardy kórsetiletin baılanys qyzmetterimen qamtamasyz etý jónindegi mindettemelerdi oryndamaǵany, sondaı-aq radıojıilik spektrin bir jyl ishinde paıdalanbaǵany úshin ákimshilik jaýaptylyq engiziledi.

Májiliste zań jobasymen jumys júrgizý barysynda birqatar túzetýler qabyldandy. Máselen, «Alqabıler týraly» Zańǵa alqabılerge kandıdattardyń biryńǵaı tizimin qalyptastyrý tártibin reglamentteıtin normalar engizildi.

«Qabyldanǵan zań basqarýshylyq sheshimder qabyldaý kezinde ınnovatsııalyq tsıfrlyq tehnologııalardy qoldaný aıasyn keńeıtý úshin zańnamalyq jaǵdaı jasaýǵa baǵyttalǵan. Sonymen qatar zań aıasynda aýyldarda baılanys sapasyn jaqsartý jáne memlekettik qyzmetterdi alý kezindegi azamattar men bıznestiń shyǵyndaryn tómendetý kózdelip otyr», – dedi zań jóninde pikir bildirgen Senat tóraǵasy Máýlen Áshimbaev.


Avtor:

Rýslan Ǵabbasov

Novostı po teme