Jańalyqtar  >

Semeıdegi jylý máselesi: Úılerge jylý barý úshin taǵy bir qazandyq iske qosyldy

2022 jylǵy 29 qarasha, 01:40
Semeıdegi jylý máselesi: Úılerge jylý barý úshin taǵy bir qazandyq iske qosyldy

SEMEI. QazAqparat – Semeı qalasyndaǵy shaǵynaýdan turǵyndarynyń shaǵymynan keıin úılerdi jylytý úshin taǵy bir qazandyq iske qosyldy, dep habarlaıdy QazAqparat tilshisi.

Semeıdegi shaǵynaýdanda jylýdyń azaıýyna qatysty tekserý jumystary júrgizildi.

«Sońǵy eki kúnde «Qaraǵaıly» shaǵynaýdanyndaǵy turǵyndardan jylý júıesi týraly tolassyz aryz-shaǵymdar kelýde. Bul másele meniń jiti baqylaýymda. «Teplokommýenergo» MKK mamandary úıdiń qurylysyn júrgizgen merdiger kompanııamen birlesip, jylý júıesin tekserý boıynsha jumystar júrgizdi. Osy shaǵynaýdandy jylýmen jabdyqtaý kózi – 3 aýdandyq qazandyq», - deıdi qala ákimi Nurbol Nursaǵatov.

Qaraǵaılydaǵy №42A úıdiń jylýyn tekserý kezinde jertóledegi 2 jylý almastyrǵyshtyń tek bireýi jumys istep turǵandyǵy anyqtaldy. Jylý júıesin qalypqa keltirý úshin isten shyqqan ekinshi jylý almastyrǵysh qaıta qosyldy. Sonymen qatar «Teplokomýnenergo» MKK úılerdi jylytý úshin qosymsha taǵy bir qazandyqty iske qosqan.

Eske salsaq, osyǵan deıin Semeıdegi shaǵynaýdan turǵyndary páterde jylýdyń azaıǵanyna shaǵymdanǵanyn habarlaǵan edik.


Uqsas jańalyqtar
Seriktester jańalyqtary

Jańalyqtar