Semeıde órt shyqqan kópqabatty úıden 40 adam evakýatsııalandy
2022 jylǵy 20 qańtar 12:25

Semeıde órt shyqqan kópqabatty úıden 40 adam evakýatsııalandy

SEMEI. QazAqparat – Semeı qalasynda órt shyqqan kópqabatty úıden 40 adam evakýatsııalandy, dep habarlaıdy QazAqparat tilshisi.

ShQO Tótenshe jaǵdaılar departamenti baspasóz qyzmetiniń málimetine súıensek, búgin tún ortasynda Semeıdegi kópqabatty úıde órt shyqty. Qutqarýshylar habar túsken soń 4 mınýtta oqıǵa ornyna kelip jetken. Úıdiń 4 jáne 9 qabat arasyndaǵy elektr symdary janǵan. Osynyń saldarynan podez ishin kók tútin basty.

«Órt sóndirýshiler barlyq páterlerdiń esigin qaǵyp, turǵyndardy oıatty. Tútinge túnshyqqandar birden taza aýaǵa shyǵaryldy. Úıdiń joǵarǵy qabattarynan 17 adam, onyń ishinde 7 bala qutqaryldy. Tómengi qabattardan 40 adam evakýatsııalandy. Azamattar «Vahta» avtokóligine ornalastyryldy», - delingen aqparatta.

Túngi saǵat 2-ge taman qyzyl jalyn tolyqtaı aýyzdyqtaldy. Órttiń shyǵýyna – otty abaısyz qoldaný nemese elektr jabdyǵynyń apattyq rejımi sebep bolýy múmkin. Tilsiz jaýdy óshirýge 25 adam men 6 tehnıka jumyldyryldy.


Jańalyqtar

MURAǴAT