Jańalyqtar  >

Semeıde dárigerler jańa týǵan sábıdiń ókpesine kúrdeli ota jasap, aman alyp qaldy

2022 jylǵy 4 jeltoqsan, 05:08
Semeıde dárigerler jańa týǵan sábıdiń ókpesine kúrdeli ota jasap, aman alyp qaldy

SEMEI. QazAqparat – Semeı qalasyndaǵy perınataldy ortalyqta jańa týǵan sábıge kúrdeli ota jasaldy, dep habarlaıdy QazAqparat tilshisi.

Áleýmettik medıtsınalyq saqtandyrý qory Abaı oblystyq fılıalynyń málimetine súıensek, perınataldy ortalyqta dúnıege kelgen náresteniń ókpesinen týabitti aqaý – kıstozdy-adenomatozdy malformatsııa anyqtalǵan.

Ol birden qarqyndy emdeý bólimine aýystyrylyp, ókpeni jasandy jeldetý apparatyna qosyldy.

Sodan soń kishkentaı patsıenttiń dúnıege kelgeniniń 16-shy kúni sırek ári kúrdeli ota jasaldy.

«Mundaı kúrdeli aqaýy bar náresteni emdeý úshin negizinen Astana nemese Almaty qalalaryna aparý kerek. Biraq náresteniń aýyr jaǵdaıyna baılanysty ony tasylmaldaý múmkin bolmady. Sondyqtan Almaty qalasynyń Pedıatrııa jáne balalar hırýrgııasy ǵylymı ortalyǵy balalar hırýrgııasy bóliminiń meńgerýshisi K.Haırov, Semeı medıtsına ýnıvesıtettik gospıtaliniń balalar hırýrgııasy bólimi meńgerýshisi E.Jumajanov, germanııalyq hırýrg Marııa Kraýzak shuǵyl túrde shaqyryldy», - deıdi perınataldy ortalyqtyń neonataldyq qyzmet jetekshisi Gýljazıra Dıýsekenova.

Aq halattylar nárestege ota jasap, sol jaq ókpeniń kıstasyn aldy. Osylaısha, náresteniń ómiri qutqaryldy.

Otadan keıin náreste ózdiginen dem ala bastady. Qazirgi ýaqytta ol anasymen birge aýrýhanadan shyǵaryldy.

«Bilikti dárigerlerdiń arqasynda ota sátti ótti. Alǵysymda shek joq. Sábıim ekeýimiz qazir úıdemiz. Aldaǵy ýaqytta balamnyń densaýlyǵyna asa muqııat bolyp, ońaltý sharalarynan qalys qalmaýym kerek», - deıdi anasy Dınara Sadyqova.


Tegı:
Seriktester jańalyqtary

Jańalyqtar