Semeı qalasynyń jańa gerbi bekitildi
2022 jylǵy 24 maýsym 21:35

Semeı qalasynyń jańa gerbi bekitildi

CEMEI. QazAqparat – Abaı oblysynyń ortalyǵyna aınalǵan Semeı qalasynyń jańa gerbi bekitildi, dep habarlaıdy QazAqparat tilshisi.

Búgin Semeı qalasy máslıhatynyń kezekti 25-shi sessııasy ótti. Onda depýtattar shahar gerbin bekitti. Gerbtiń sheńber túrinde bolýy máńgiliktiń sımvolyn aıshyqtaıdy.

«Jasyl tús - tabıǵattyń, úılesimdilik pen tepe-teńdiktiń sımvolyn bildiredi jáne ol qaıta jańǵyrýmen baılanysty. Geraldıka zańdary boıynsha kún ómir jolyn sıpattaıdy. Gerbtiń ishinde - baqyt sımvoly túrindegi oıý-órnekpen kómkerilgen shańyraq beınesi beınelengen», - dep habarlady qala ákimdigi.

Tórt bóliktiń arasynda kitap, qaraǵaı, túıe jáne kópirdiń sulbasy beınelengen. Kitap Semeı qalasyn Qazaqstannyń rýhanı-mádenı ortalyǵy, Abaı, Shákárim, Muhtar Áýezov syndy uly tulǵalardyń Otany retinde beıneleıdi.

«Shańyraqtyń sol jaq bóliginde ornalasqan qaraǵaı sýreti óńirdiń tabıǵı beınesiniń ajyramas bóligi retinde kórsetilgen. Sebebi Semeıde biregeı qaraǵaı ormany ornalasqan. Túıe – ǵasyrlar júgin arqalaǵan dala kemesi ispettes. Revolıýtsııaǵa deıin Semeı qalasy Reseı men Batys Qytaı qalalarynyń saýda ortalyǵy bolǵan jáne Jibek jolynyń bóligi sanalǵan. Jańa kópir - zamanaýı jetistikterdiń kórsetkishi jáne qalanyń kórikti jeri sanalady», - delingen aqparatta.

«Semeı» ataýy sımvoldyń tómengi jaǵynda ornalasqan jáne altyn áriptermen jazylǵan. Altyn tús - ál-aýqat pen órkendeýdiń sımvoly. Sary jáne kók tústiń aralasýy jasyl túske aınalyp, jomarttyqtyń, jandanýdyń jáne jaqsy istiń bastamasynyń sımvolyn bildiredi.

«Beıbitshilik» aralynyń «Túıemoınaq» stelasyndaǵy jeti qarlyǵashtyń beınesi – qyryq jylǵy atom synaqtaryn jeńgeniniń aıqyn kórinisi. Qazaq halqy úshin jeti sany qasıetti, «Jeti urpaq», «Jeti Qara» jáne taǵy da basqa kóptegen uǵymdar osy sanmen baılanysty.

Osylaısha, Semeı qalasynyń jańa gerbinde qalanyń rýhanı, tarıhı, tabıǵı jáne zamanaýı kelbeti kórinis tapqan. Gerbtiń avtory - qalalyq mádenıet saraıynyń qoıýshy sýretshisi Erlan Ámirbek.


Uqsas jańalyqtar

Jańalyqtar

Úrdis

MURAǴAT