Saıram-Ógem ulttyq parkiniń bas dırektoryna jemqorlyqqa jol berdi degen kúdik keltirilip otyr
ASTANA. QazAqparat - Orman sharýashylyǵy jáne janýarlar dúnıesi komıtetiniń birqatar laýazymdy tulǵalaryna jemqorlyqqa jol berdi degen kúdik keltirilip otyr.
Bul týraly QazAqparat QR Sybaılas jemqorlyqqa qarsy is-qımyl agenttiginiń baspasóz qyzmetine silteme jasap habarlaıdy.
Shymkent qalasynyń Sybaılas jemqorlyqqa qarsy qyzmeti Qazaqstan Respýblıkasy Ekologııa jáne tabıǵı resýrstar mınıstrligi Orman sharýashylyǵy jáne janýarlar dúnıesi komıtetiniń «Saıram-Ógem memlekettik ulttyq tabıǵı parki» RMK bas dırektoryna, onyń birqatar baǵynystylaryna, sondaı-aq Komıtettiń Býhgalterlik esep jáne bıýdjettik josparlaý basqarmasynyń basshysyna qatysty aldaý jáne senimge qııanat jasaý, para berý jáne alý arqyly ózge múlikti urlady degen kúdik boıynsha sotqa deıingi tergeý júrgizedi.
Qazirgi ýaqytta laýazymdy tulǵalar ustalyp, ýaqytsha ustaý ızolıatoryna qamaýǵa alyndy.
Tergeý jalǵasýda. Tergeý múddesi úshin ózge aqparat jarııa etýge jatpaıdy.
Foto: gainfactchecker.org
Jańalyqtar
