Saýl «Kanelo» Alvares reseılik boksshydan jeńilip qaldy
2022 jylǵy 8 mamyr 12:01

Saýl «Kanelo» Alvares reseılik boksshydan jeńilip qaldy

NUR-SULTAN. QazAqparat - Meksıkalyq boksshy Saýl «Kanelo» Alvares reseılik Dmıtrıı Bıvoldan jeńilip qaldy, dep habarlaıdy QazAqparat tilshisi.

Atalǵan jekpe-jek AQSh-tyń Nevada shtatynda Las-Vegas qalasyndaǵy T-Mobile arenasynda ótkizildi.

Jekpe-jek tartysty órbidi. Ol 12 raýndqa josparlanǵan bolatyn. Bıvol azýly qarsylasyna laıyqty kúsh kórsete aldy. Nátıjesinde tóreshilerdiń sheshimimen reseılik sportshy jeńiske jetti.

Meksıkalyq boksshy qazirge deıin 57 jekpe-jek ótkizdi. Búgin nebári ekinshi márte qarsylasyna ese jiberip qoıdy.

Al Dmıtrıı Bıvol kásipqoı boksta 20 kezdesýiniń barlyǵynda jeńiske jetti.

Reseılik sportshy 1990 jyly dúnıege kelgen. 2014 jyldan beri kásipqoı boksta baq synap keledi.

Aıta ketsek, «Kanelonyń» qazaqstandyq Gennadıı Golovkınmen (42-1-1, 37 KO) úshinshi jekpe-jegi meksıkalyq boksshy Bıvoldy jeńgen jaǵdaıda josparlanǵan bolatyn.

Eske salsaq, budan buryn boksshy Danııar Eleýsinov IBF reıtıngisinen shyǵyp qaldy.


Uqsas jańalyqtar
Seriktester jańalyqtary

Jańalyqtar

Úrdis

MURAǴAT