«Saryarqa» gaz qubyrynyń qýaty Nur-Sultan men Qaraǵandyǵa ǵana jetedi – energetıka mınıstri
2022 jylǵy 20 mamyr 15:16

«Saryarqa» gaz qubyrynyń qýaty Nur-Sultan men Qaraǵandyǵa ǵana jetedi – energetıka mınıstri

NUR-SULTAN. QazAqparat – QR Energetıka mınıstri Bolat Aqsholaqov BAQ ókilderine eldiń soltústigi men shyǵysyndaǵy óńirlerdi gazdandyrý múmkindikteri týraly málimet berdi, dep habarlaıdy QazAqparat tilshisi.

«Soltústik jáne shyǵys óńirlerge gaz tartý máselesi boıynsha mamyr aıynyń aıaǵynda, kelesi aptada issaparǵa ushamyn. Sol jaqta Reseı Federatsııasynan gaz tasymaldaýdyń tehnıkalyq, ekonomıkalyq máseleleri, baǵasy boıynsha áńgime júrgizemin. Bul – óte keshendi másele. Osymen qatar, óz ishimizdegi gaz qubyrlaryn soltústik jáne shyǵys baǵyttarda damytý kerek. Biraq, qazirgi «Saryarqa» gaz qubyry Qaraǵandy jáne qaıtadan qurylyp jatqan Ulytaý oblystary arqyly Nur-Sultanǵa jetedi. Odan ári kelesi kezeńde Aqmola oblysy – Kókshetaý qalasy men Petropavlǵa deıin tartylady. Osyndaı jeli bar», - dedi vedomstvo basshysy.

Onyń aıtýynsha, bul qubyrdan shyǵys baǵytqa Pavlodar arqyly tarmaq shyǵarýǵa bolady.

«Pavlodardan ári qaraı Semeı dep kete beredi. Alaıda, bul – joba ǵana. Ózimizdi tabıǵı gazdyń kózderinen qamtamasyz etý úshin Batys óńirlerden qosymsha ári turaqty gaz qoryn tabýymyz kerek. Mundaı gaz qory tabylǵan kúnniń ózinde jańa qubyr tartý qajet. Óıtkeni, qazir qoldanyp otyrǵan «Saryarqa» gaz qubyry onyń bárin kótere almaıdy. Qaraǵandy oblysy men Nur-Sultan qalasynyń qajettiligin ǵana jabýǵa qaýqarly. Sonda báribir jańa qubyr salý kerek bolady. Bárinen de Reseıden gaz ala turyp, óz ishimizdegi qubyrlardy qatar damytý jeńil bolatyn shyǵar. Onyń ózinde, ózimizdiń gaz Reseıdikinen arzan bolady degen naqty derek joq. Óıtkeni, Batys Qazaqstannan Petropavlǵa deıingi aralyq 2000 shaqyrymnan asady. Al, Reseıden beri tartsaq, 500-600 shaqyrym. Qashyqtyń aıyrmashylyǵy orasan. Al, gaz qubyrynyń shyǵyny tikeleı soǵan baılanysty», - dedi Bolat Aqsholaqov.

Buǵan deıin energetıka mınıstri maınıng fermalardy ulttyq elektr júıesinen bólip tastaýdy usyndy.


Jańalyqtar

MURAǴAT