Sársenbi kúni 7 óńirde qatty ystyq bolady
2022 jylǵy 29 maýsym 04:16

Sársenbi kúni 7 óńirde qatty ystyq bolady

NUR-SULTAN. QazAqparat - Atmosferalyq frontaldy bólikterdiń áserinen Qazaqstan aýmaǵynyń basym bóliginde qubylmaly kún raıy saqtalady: naızaǵaı oınap, jańbyr jaýady. Soltústikte, soltústik-batysta, ońtústikte, ońtústik-shyǵysta – burshaq, soltústikte, soltústik-batysta, ońtústikte – daýyl, ońtústik-batysta, ońtústikte – shańdy daýyl kútiledi. Respýblıka boıynsha ekpindi jel boljanady, dep habarlaıdy QazAqparat Qazgıdrometke silteme jasap.

Túnde Soltústik Qazaqstan oblysynyń shyǵysynda qatty jańbyr jaýady.

Kúndiz Jetisý oblysynyń Alakól kólderi aýdanynda kúshi 30 m/s jetetin jel kútiledi.

Kúndiz Almaty, Jambyl, Túrkistan oblystarynyń basym bóliginde, Mańǵystaý, Qyzylorda, Abaı, Shyǵys Qazaqstan oblystarynyń ońtústiginde qatty ystyq bolady. Túrkistan oblysynyń batysynda, shóldi aýdandarynda, Jambyl oblysynyń ońtústiginde, batysynda, soltústiginde óte qatty ystyq boljanady.

Qyzylorda, Almaty oblystarynyń basym bóliginde, Abaı oblysynyń batysynda, Batys Qazaqstan oblysynyń shyǵysynda, Atyraý oblysynyń batysynda, shyǵysynda, Ulytaý oblysynyń ońtústik-batysynda, Qaraǵandy oblysynyń ońtústik-shyǵysynda, Jambyl oblysynyń ońtústiginde, Pavlodar oblysynyń ortalyǵynda, Túrkistan oblysynyń soltústiginde tótenshe órt qaýpi kútiledi.


Uqsas jańalyqtar
Seriktester jańalyqtary

Jańalyqtar

Úrdis

MURAǴAT