Saparhan Omarov kóktemgi egis naýqanyn qarjylandyrý jumystary týraly aıtty

NUR-SULTAN. QazAqparat – Búgin Úkimet otyrysynda QR Aýyl sharýashylyǵy mınıstri Saparhan Omarov kóktemgi egis naýqanyn qarjylandyrý jumystary týraly aıtyp berdi, dep habarlaıdy QazAqparat tilshisi.

«Agrarlyq nesıe korporatsııasy» aktsıonerlik qoǵamyna agroónerkásiptik keshen sýbektilerin qoldaý jónindegi is-sharalardy júrgizý úshin respýblıkalyq bıýdjetten 70 mlrd teńge bıýdjettik nesıe bólindi, bul ótken jyldardan 10 mlrd teńgege artyq. Túpkilikti qaryz alýshylar úshin jyldyq syıaqy mólsherlemesi 5 paıyzdan aspaıdy», - dedi S. Omarov Úkimet otyrysynda.

Onyń sózine qaraǵanda, agroónerkásiptik keshen sýbektilerine nesıe berýdi ekinshi deńgeıdegi bankterdiń kepildigimen tikeleı korporatsııa arqyly júrgizý josparlanyp otyr. Sondaı-aq kredıt berýdi odan ári agroónerkásiptik keshen sýbektilerin qarjylandyrý úshin óńirlik ınvestıtsııalyq ortalyqtardyń kepildigimen ekinshi deńgeıdegi bankterdi, kredıttik seriktestikterdi, óńirlik ınvestıtsııalyq ortalyqtardy ári mıkroqarjy uıymdaryn qorlandyrý arqyly da júzege asyrý kózdelip otyr.

«3 mln gektar egis alańyn qarjylandyrýmen qamtý, 2 400 aýyl sharýashylyǵy taýaryn óndirýshige nesıe berý josparlanýda. Qazirgi ýaqytta 56 mlrd teńge somasyna 1 516 ótinim qabyldandy, 22,9 mlrd teńge somasyna 1,4 mln gektar alańdy qamtıtyn 258 ótinim qarjylandyryldy», - dedi Aýyl sharýashylyǵy mınıstri.

Budan buryn habarlanǵandaı, bıyl aýyl sharýashylyǵy daqyldary 22,5 mln gektar alańǵa egiledi. Sonymen qatar mınıstr kóktemgi egis naýqanyna tehnıkanyń daıyndyq deńgeıi týraly baıandady. Munymen qosa, tuqymdy Qazaqstannan alǵandar da, sheteldik óndirýshilerden tikeleı satyp alǵandar da sýbsıdııalyq qoldaýǵa ıe bolady.