«Samuryq-Qazyna» basshysy qordy reformalaý boıynsha usynys kútedi
2022 jylǵy 24 qańtar 10:13

«Samuryq-Qazyna» basshysy qordy reformalaý boıynsha usynys kútedi

NUR-SULTAN. QazAqparat – Qazaqstan azamattaryna «Samuryq-Qazyna» qory aktıvterin ıelik etý múmkindigi berilmek. Bul jaıynda atalǵan qordyń basqarma tóraǵasy Almasadam Sátqalıev aıtty, dep habarlaıdy QazAqparat tilshisi.


«Búginde el basshylyǵynyń saıası erik-jigeriniń arqasynda «Samuryq-Qazynada» qoǵamda belsendi talqylanyp jatqan reformalardy júrgizý úshin biregeı múmkindik paıda boldy. Biz reformalaý baǵdarlamasynyń jobasyna engizý úshin syndarly usynystar beretin barlyq azamatpen dıalog júrgizemiz. Taıaý ýaqytta bul josparlar ashyq derekkózderge jáne korporatıvtik saıtymyzda jarııalanady. Biz sizderdiń barlyq saýaldaryńyzǵa jaýap beremiz. Bazalyq prıntsıpter retinde ashyqtyq pen eseptilik, bıznes úshin kedergilerdi joıý, áleýmettik jaýapkershilik jáne jemqorlyqpen kúres aıqyndalǵan. Menińshe, ulttyq baılyqty ádil bólý elementi retinde qor aktıvterin ıelik etýge Qazaqstan Respýblıkasy azamattarynyń tikeleı qatysý múmkindigi betburysty sát bolmaq», - dep jazdy qor basshysy Facebook-te.

Onyń atap ótýinshe, qordyń kompanııalar tobynda el ekonomıkasynyń basty problemalaryn sheshý maqsatynda munaı, gaz, kómir, temirjol kóligi, elektr energııasy men telekommýnıkatsııa naryqtaryndaǵy ózara qatynas qurylymyn ózgertýge, bıznes-protsesterdi reformalaýǵa jáne korporatıvtik tájirıbege baǵyttalǵan birqatar teńdessiz is-shara usynylady.

«Biz satyp alýlar júıesin túbegeıli qaıta qaraýǵa, otandyqtaýar óndirýshiler men shaǵyn jáne orta bıznesti qoldaý tetikterin kúsheıtýge nıettimiz. Bul máseleler sársenbi, 26 qańtar kúni bıznes qoǵamdastyqpen áleýmettik jelilerde onlaın-translıatsııa arqyly ashyq dıalog formatynda talqylanady. Baǵdarlama bekitilgen jaǵdaıda men ony barynsha sátti engizip, oryndalýyn qamtamasyz etýge daıynmyn. Sizderden usynys kútemiz. Ony bizdiń usynys@sk.kz korporatıvtik poshtamyzǵa jiberýge bolady», - deıdi Almasadam Sátqalıev.

Eske salaıyq, 11 qańtar kúni Májilistiń jalpy otyrysynda Memleket basshysy Qasym-Jomart Toqaev «Samuryq-Qazyna» qorynda reformalaý júrgizý múldem múmkin bolmasa, ondaı qurylymnyń ekonomıkamyzda bolmaǵany jón ekendigin aıtqan bolatyn.

«Samuryq-Qazyna» qory qyzmetiniń tıimdiligi máselesine toqtalǵan Prezıdent, búginde bul qordyń aktıvi elimizdiń ishki jalpy óniminiń 60 paıyzyna jýyqtaıtynyn aıtty. ıAǵnı, osy uıymnyń tıimdi qyzmeti búkil ekonomıkamyzdy órkendetýge tikeleı áser etedi. Qordyń KEGOK, Qazaqgaz jáne Qazaqstan temir joly sııaqty ınfraqurylymdyq kompanııalary ekonomıkamyzdyń barlyq derlik sektorynyń tıimdiligin aıqyndaıdy. Osy tusta, qor óziniń negizgi mindetin oryndap otyr ma, ıaǵnı ulttyq baılyqty eseleı aldy ma degen oryndy suraq týyndaıdy. Qomaqty jalaqy alatyn qyzmetkerleri, dırektorlar keńesi nemen aınalysady? Qyzmeti óte qymbat konsaltıng kompanııalaryn jáne sheteldik mamandardy jumysqa tartqannan paıda bar ma?», - degen bolatyn QR Prezıdenti.

Osy rette Q.Toqaev «Samuryq-Qazyna» qory men basqa da ulttyq kompanııalardyń satyp alýlary tártibin qaıta qarastyrýdy tapsyrdy.

20 qańtar kúni Memleket basshysy Qazaqstannyń iri bıznes ókilderimen kezdesýinde «Samuryq-Qazyna» qorynyń basshysyna Qordy túbegeıli reformalaý týraly mindet júktelgenin, eger ol mindetti eńsere almasa, jumystan ketetinin aıtty.

QR Premer-Mınıstri Álıhan Smaıylov «Samuryq-Qazyna» holdınginiń shamamen 40 kásipornyn jekeshelendirý josparlanyp otyrǵanyn málim etti.


Jańalyqtar

MURAǴAT