Rýslan Jeldibaı Prezıdenttiń Frantsııaǵa sapary týraly: Mıllıondaǵan dollarlyq ınvestıtsııa tartýǵa kelisim-sharttar jasaldy

2022 jylǵy 30 qarasha, 17:30
Rýslan Jeldibaı Prezıdenttiń Frantsııaǵa sapary týraly: Mıllıondaǵan dollarlyq ınvestıtsııa tartýǵa kelisim-sharttar jasaldy

PARIJ. QazAqparat - Prezıdenttiń Frantsııaǵa jasaǵan resmı saparynyń basym baǵyttarynyń biri ekonomıkalyq yntymaqtastyq boldy. Bul týraly QR Prezıdentiniń baspasóz hatshysy Rýslan Jeldibaı jelidegi paraqshasynda jazdy, dep habarlaıdy QazAqparat.

«Memleket basshysy Frantsııanyń jetekshi kompanııalarynyń basshylarymen birqatar kezdesý ótkizdi. Kezdesýde saýda, ınvestıtsııa, ónerkásip, kólik-logıstıka jáne energetıka salalaryndaǵy máseleler jan-jaqty talqylandy.

Munaı-gaz salasynda iri kásiporyn sanalatyn Total Energies kompanııasy elimizge 12 mlrd dollar ınvestıtsııa quıǵan. Dırektorlar keńesiniń tóraǵasy Patrık Pýıanne Prezıdentke onyń kompanııasy Qazaqstanda taǵy birneshe aýqymdy jobany júzege asyrýǵa nıetti ekenin jetkizdi. Atap aıtqanda, qýaty 1 GVt-tyq jel elektr stantsııasynyń qurylysy sóz boldy. Nysan 2026-2027 jyldary Qazaqstannyń ońtústik-shyǵysynda paıdalanýǵa beriledi. Jobanyń boljamdy quny – 1,9 mıllıard dollar. Air Liquide hımııa kompanııasynyń prezıdenti Fransýa Jakov Memleket basshysyna onyń kompanııasy Qazaqstanda jalpy ınvestıtsııa kólemi 120 mıllıon eýro bolatyn jobalardy iske asyrǵany týraly aıtyp berdi. Kompanııanyń qatysýymen qurylǵan birlesken kásiporyn Atyraý men Pavlodardaǵy munaı óńdeý zaýyttarynyń negizinde tehnıkalyq gaz óndirisin jolǵa qoıdy.

Orano S.A. kompanııasy dırektorlar keńesiniń tóraǵasy Klod Imoven KATCO birlesken kásiporny Qazaqstanda jyldyq ýran óndirisiniń 15% jáne álemdik óndiristiń 7% óndiretinin jetkizdi. Orano S.A. – Frantsııa atom ónerkásibi salasynyń kóshbasshysy.

Atom energetıkasy máselesi Électricité de France (EDF) bas dırektory Lıýk Remonmen bolǵan kezdesý barysynda da qozǵaldy. Prezıdent Lıýk Remonmen atom energetıkasyna ozyq tehnologııalardy engizý perspektıvalaryn qarastyrdy. Atalǵan másele elimizde AES salý jospary turǵysynan ózekti. Sondaı-aq jańartylatyn energııa kózderi salasyndaǵy jobalardy iske asyrý múmkindikteri talqylandy. Alstom kompanııasy dırektorlar keńesiniń tóraǵasy Anrı Pýpar-Lafarj Memleket basshysyna kompanııa jaqyn arada elektrovozdar men temirjol kóligi jabdyqtaryn óndirý, qyzmet kórsetý jónindegi jobalarǵa 50 mıllıon eýro ınvestıtsııa quıatynyn aıtty. Energetıkalyq jabdyqtar men temirjol kóligi óndirisinde álemdik kóshbasshylardyń biri sanalatyn Alstom kompanııasynyń servıstik ortalyqtary Astana, Almaty qalalarynda, Jambyl jáne Túrkistan oblystarynda ashylady. Bul jobalardy iske asyrýǵa myńnan astam qazaqstandyq maman jumyldyrylady», - dedi Rýslan Jeldibaı.

Sonymen qatar ol Memleket basshysy Airbus, Saint-Gobain, Boehringer Ingelheim France, Soufflet Group, Total Energies, BPI France, Vicat, Syctom, Pellenc, Total Eren, PCM, Safran, Thales, Groupe EDF, Assystem, Evolution International, MHB SAS, Exa International, Rungis Semmaris, MBDA, SOPREMA jáne basqa da Frantsııanyń iri kompanııalarynyń basshylarymen kezdeskenin jáne bul shara Prezıdenttiń Parıjge jasaǵan sapary aıasyndaǵy mańyzdy oqıǵanyń biri bolǵanyn jetkizdi.

«Prezıdent óz sózinde ınvestıtsııalyq yntymaqtastyqtyń keleshegi mol baǵyttaryn usyndy. Atap aıtqanda, agroónerkásip kesheni, energetıka, ekonomıkanyń naqty sektory, kólik jáne logıstıka, tsıfrlandyrý salalaryndaǵy jobalar týraly sóz boldy. Memleket basshysynyń Frantsııaǵa sapary aıasynda ekonomıkamyzǵa zor paıda ákeletin otyzǵa jýyq kelisimge qol qoıyldy.Osylaısha, Prezıdenttiń Parıjdegi árbir kezdesýinde naqty jobalardy iske asyrýǵa, mıllıondaǵan dollarlyq ınvestıtsııa men ozyq tehnologııalardy tartýǵa jáne jańa jumys oryndaryn ashýǵa múmkindik beretin kelisim-sharttar jasaldy», - dep tolyqtyrdy R. Jeldibaı.

Foto: akorda.kz


Uqsas jańalyqtar
Seriktester jańalyqtary

Jańalyqtar