Rıdder JEO-daǵy órt: Otyn tsehy erteń iske qosylady
ÓSKEMEN. QazAqparat – Shyǵys Qazaqstan oblysynyń Rıdder qalasyndaǵy jylý elektr ortalyǵynda órt saldaryn joıý jumystary aıaqtalýǵa jaqyn, dep habarlaıdy QazAqparat tilshisi.
ShQO ákimdiginiń málimetine súıensek, Rıdderdegi JEO-da órt shyqqan otyn tsehyn qalypqa keltirý jumystary úzdiksiz júrgizilip jatyr.
«Kómir berý traktin jóndeý jalǵasýda. Osy túnde jelimdeý jumystary aıaqtalady dep kózdelgen», - deıdi oblys ákiminiń orynbasary Erjan Nurbaev.
Onyń aıtýynsha, sodan keıin iske qosý-retteý protsesi bastalady. 25 qańtar kúni ortalyqtyń otyn tsehy qalypty jumys rejımine kóshedi dep josparlanyp otyr.
Eske salsaq, 19 qańtarda Rıdderdegi jylý elektr ortalyǵynan órt shyqqan bolatyn.
Birneshe saǵattyń ishinde qyzyl jalyn aýyzdyqtaldy.
Keıinnen jylý elektr ortalyǵynyń basshylyǵyna qatysty tergeý júrgizilip jatqany habarlandy.
Danıal Ahmetov Rıdder jylý elektr ortalyǵyndaǵy aqaýlar men apattardan úıleri qaıta-qaıta sýyp ketip otyrǵan turǵyndardan keshirim suraǵan edi.
Oblys basshysynyń aqparaty boıynsha, JEO-ny kúrdeli jóndeýden ótkizýge 7 mlrd teńge qarastyrylyp otyr.
Sonymen qatar jylý elektr ortalyǵynyń ıesi aýysqany belgili boldy.
