Reseı eýrobondtar boıynsha defoltqa ushyrady
2022 jylǵy 28 maýsym 13:52

Reseı eýrobondtar boıynsha defoltqa ushyrady

MÁSKEÝ. TASS-QazAqparat - Moody's agenttigi Reseıdiń syrtqy qaryz mindettemelerin oryndamaǵany týraly habarlady. Bul týraly halyqaralyq reıtıng agenttiginiń saıtyndaǵy habarlamada aıtylǵan, dep jazady QazAqparat TASS aqparat agenttigine silteme jasap.

«27 maýsymda Reseıdiń egemendik qaryzyn ustaýshylar eýrooblıgatsııalar shyǵarylymy boıynsha («Reseı-26» jáne «Reseı-36» - TASS) 30 kúndik jeńildikti kezeń aıaqtalǵanǵa deıin 100 mıllıon dollar kólemindegi kýpondyq tólemderdi alǵan joq. Bul bizdiń anyqtamamyz boıynsha defoltty bildiredi», - dep keltiredi TASS reıtıng agenttiginiń jazbasyn.

Ótken aıda AQSh Reseıge syrtqy qaryzyna qyzmet kórsetýge tólem jasaýǵa múmkindik beretin bas lıtsenzııany uzartqan joq. Osylaısha, Reseı qaryzdy óteý úshin ótken aptada mundaı tólemderdi júzege asyrýǵa múmkindik beretin jańa mehanızmdi qoldana otyryp, alǵash ret rýbldegi eýrooblıgatsııalar boıynsha mindettemelerin oryndady.

Reseı Qarjy mınıstri Anton Sılýanovtyń beısenbi kúni atap ótkenindeı, bul syrtqy qaryz boıynsha defoltqa ushyraýdy bildirmeıdi - kredıtorlardyń Máskeý óz mindettemelerin durys oryndamaı jatyr dep paıymdaýǵa negiz joq, óıtkeni Reseı fors-majorlyq jaǵdaıda kredıt berýshilerdiń óz qaryzdaryn alýy úshin bárin jasap otyr.

Sılýanovtyń aıtýynsha, AQSh pen Eýroodaq Reseıdiń syrtqy qaryzyna «defolt» belgisin qoıý úshin oǵan qyzmet kórsetýge jasandy kedergiler jasaýda.

Óz kezeginde Moody's bolashaq kýpondyq tólemder boıynsha defoltty joqqa shyǵarmaıdy.

«Reseı Prezıdentiniń 22 maýsymdaǵy jarlyǵymen syrtqy qaryzdy rýblmen tóleý tártibi engizildi. Biz sharttyq talaptarǵa sáıkes mundaı nomınatsııaǵa jol bermeıtin oblıgatsııalar úshin rýbldegi tólemderdi defolt retinde qarastyramyz dep oıladyq», - delingen TASS keltirip otyrǵan Moody's málimdemesinde.

Onda Reseıdiń 2018 jyldan keıin shyǵarǵan eýrobondtardy belgili bir sharttarda rýblmen óteýge múmkindik beretinin qosty. Degenmen, 2018 jylǵa deıin shyǵarylǵan eýrooblıgatsııalar bul erejeni qamtymaıdy nemese tek dollar, eýro, fýnt sterlıng, shveıtsarııalyq frank sııaqty valıýtada óteýge ruqsat beredi.


Uqsas jańalyqtar
Seriktester jańalyqtary

Jańalyqtar

Úrdis

MURAǴAT