Reformalardyń basty maqsaty – ádiletti Qazaqstan qurý - Máýlen Áshimbaev
2022 jylǵy 25 maýsym 17:45

Reformalardyń basty maqsaty – ádiletti Qazaqstan qurý - Máýlen Áshimbaev

NUR-SULTAN. QazAqparat – Senat Spıkeri Máýlen Áshimbaevtyń tóraǵalyǵymen ótken Senatorlar keńesiniń otyrysynda «Konstıtýtsııalyq reforma – Jańa Qazaqstannyń negizi» taqyryby sóz boldy, dep habarlaıdy QazAqparat Palatanyń baspasóz qyzmetine silteme jasap.

Otyrysty ashqan Máýlen Áshimbaev búginde Qazaqstan damýdyń jańa kezeńine qadam basqanyn aıtty. Sondaı-aq, Memleket basshysy Qasym-Jomart Toqaevtyń bastamasymen Jańa Qazaqstan qurý jolynda keshendi reformalar qolǵa alynǵanyn tilge tıek etti.

«Qazir elimiz úshin óte mańyzdy kezeń. Aýqymdy ári keshendi reformalar qolǵa alynyp, qarqyndy júrgizilip jatyr. Bul reformalardyń negizgi maqsaty ádiletti saıası-ekonomıkalyq júıe qalyptastyrý. Ádiletti júıe degenimiz, birinshi kezekte, zań ústemdigin ornatý jáne azamattardyń bárine birdeı teń múmkindik jasaý. Bul – Jańa Qazaqstan qurýdyń negizgi máni ekeni sózsiz», – dedi Senat Tóraǵasy.

Sondaı-aq, Máýlen Áshimbaev el Prezıdentiniń bastamasymen qolǵa alynǵan jáne referendým kezinde qazaqstandyqtardyń basym bóligi qoldaý bildirgen reformalardy sapaly zańnamamen qamtamasyz etý – qazir Palatanyń aldynda turǵan mańyzdy mindetterdiń biri ekenin aıtty. Bul rette aldyńǵy býyn memleket qaıratkerleriniń, onyń ishinde Senatorlar keńesi músheleriniń mol tájirıbesi men bilimi zor mánge ıe.

Otyrys barysynda Senattyń Konstıtýtsııalyq zańnama, sot júıesi jáne quqyq qorǵaý organdary komıtetiniń tóraǵasy Vladımır Volkov baıandama jasady. Ol quqyqtyq salany, onyń ishinde saılaý júıesin, saılaý protsesin jańǵyrtýdyń, quqyq qorǵaý ınstıtýttaryn kúsheıtýdiń mańyzdylyǵyna egjeı-tegjeıli toqtaldy.

«Memleket basshysy usynǵan saıası reformalar irgeli sıpatqa ıe. Olar qoǵamnyń saıası júıeni demokratııalandyrýǵa degen kópjyldyq suranysynan týyndap otyr. Sondaı-aq, bul ózgerister azamattardyń memlekettik sheshimderge yqpal etý jáne Jańa Qazaqstan qurýǵa tikeleı qatysý múmkindigin qamtamasyz etýdi kózdeıdi», - dedi Vladımır Volkov.

Otyrys kezinde Senatorlar keńesiniń músheleri Tóleýbek Muqashev, Serik Aqylbaı, Georgıı Kım, Dýlat Qusdáýletov jáne Serik Bekturǵanov sóz sóılep, konstıtýtsııalyq reformany iske asyrý jónindegi oılarymen bólisti.

Jańalyqtar

Úrdis

MURAǴAT