Referendýmǵa 11 mln 722 myń adam qatysady
2022 jylǵy 17 mamyr 12:21

Referendýmǵa 11 mln 722 myń adam qatysady

NUR-SULTAN. QazAqparat - Qazaqstanda 10 013 referendým ýchaskesi iske qosylady. Bul týraly elordada Ortalyq referendým komıssııasynyń otyrysynda QR Ortalyq saılaý komıssııasynyń tóraǵasy Nurlan Ábdirov málim etti, dep habarlaıdy QazAqparat tilshisi.

«Búgin biz respýblıkalyq referendýmdy ázirleýdiń mańyzdy máselelerin qarastyrdyq. Osylaısha, referendýmdy uıymdastyrý men ótkizý jónindegi naýqan jańa kezeńge aıaq basty. Ýchaskelik referendým komıssııalary jumysqa tolyǵymen kiristi. Tyńdalǵan esepterge súıensek, naqty jumystar júrgizildi. Jalpy, 10 013 referendým ýchaskesi iske qosylady», - dedi N. Ábdirov.

Osy oraıda OSK tóraǵasy atalǵan ýchaskelerde daýys berý úshin barlyq jaǵdaı jasaýdy tapsyrdy.

«Respýblıkalyq referendýmǵa qatysý quqyǵy bar azamattardyń tizimine toqtalsaq, 15 mamyrdaǵy aqparat boıynsha bul tizimde 11 mln 722 myń 536 adam engizilgen. Jergilikti atqarýshy organdar ýchaskelerdiń daýys berý kúnine daıyndyq máselelerin baqylaýda ustaýy qajet. Múgedektigi bar adamdar úshin barlyq jaǵdaıdy qamtamasyz etý baǵytynda qajetti is-sharalardy júzege asyrýǵa nazarlaryńyzdy aýdaramyn. Osy oraıda olarǵa yńǵaıly bolýy úshin ınvotaksı tartý máseleleri jáne basqa da qadamdar qosymsha pysyqtalsyn», - dedi N. Ábdirov referendýmdy ótkizý jumystaryna jumyldyrylǵandarǵa qarata aıtqan sózinde.

Budan buryn habarlanǵandaı, 5 maýsymda ótetin referendýmǵa qatysa alatyn azamattardyń tizimi jasaqtalyp jatqany aıtylǵan edi.

Referendýmda 11 óńir halqy jaqtap daýys berse, Konstıtýtsııaǵa ózgeris engiziledi.


Seriktester jańalyqtary

Jańalyqtar

Úrdis

MURAǴAT