Referendýmdaǵy halyqaralyq baıqaýshylardy tirkeý 30 mamyrǵa deıin jalǵasady
2022 jylǵy 25 mamyr 20:06

Referendýmdaǵy halyqaralyq baıqaýshylardy tirkeý 30 mamyrǵa deıin jalǵasady

NUR-SULTAN. QazAqparat – Qazaqstanda ótetin referendýmǵa júzden astam halyqaralyq baıqaýshy akkredıtteldi. Bul týraly Ortalyq saılaý komıssııasynyń tóraǵasy Nurlan Ábdirov aıtty, dep habarlaıdy QazAqparat tilshisi.

«Referendýmda sheteldik uıymdar mıssııasynyń halyqaralyq baıqaýǵa qatysýyna úlken mán beremiz. Bul elimiz úshin mańyzdy oqıǵaǵa sheteldik seriktesterdiń de qyzyǵýshylyǵyn kórsetedi. Ortalyq referendým komıssııasynyń otyrystarynda qaralǵan alǵashqy máselelerdiń biri – halyqaralyq baqylaý ınstıtýtyn ashý boldy. Qazirgi ýaqytta 100-den astam baqylaýshy akkredıtteldi. Onyń ishinde EQYU DIAQB baqylaýshylar mıssııasynyń ókilderi de bar», - dedi Nurlan Ábdirov Syrtqy ister mınıstrliginde ótken jınalysta.

OSK tóraǵasy qazirgi ýaqytta TMD, TMD Parlamentaralyq Assambleıasy, túrki memleketteri uıymy baıqaýshylarynyń mıssııalary akkredıttelgenin atap ótti.

«Búginde 17 memlekettiń delegatsııa ókilderi akkredıtteldi. Bul jumys jalǵasyp jatyr. Halyqaralyq baıqaýshylardy akkredıtteý 30 mamyr kúni saǵat 18:00-ge deıin jalǵasady», - dedi N. Ábdirov.

Saılaý komıssııasynyń aqparaty boıynsha, respýblıkalyq referendýmǵa elden tys ýchaskelerdi qosa alǵanda, barlyǵy 10 012 ýchaske tartylatyn bolady. Tizimge 11 mln 722 myń 536 azamat engizildi. 20 mamyrdan bastap azamattarǵa osy tizimderde ózderin tekserýge múmkindik berildi.


Uqsas jańalyqtar

Jańalyqtar

MURAǴAT