Referendýmda keler urpaqtyń da taǵdyryna áser etetin keleli sheshimder qabyldanady - Dosaev
2022 jylǵy 19 mamyr 19:32

Referendýmda keler urpaqtyń da taǵdyryna áser etetin keleli sheshimder qabyldanady - Dosaev

ALMATY. QazAqparat – 5 maýsymda ótetin respýblıkalyq referendým – sońǵy 27 jyl ishinde tuńǵysh ret ótkiziletin, tarıhı máni zor, el ómirindegi eleýli oqıǵa. Bul týraly Almaty ákimi Erbolat Dosaev Naýryzbaı aýdany turǵyndarymen kezdesý barysynda aıtty, dep habarlaıdy QazAqparat tilshisi.

Almaty ákiminiń aıtýynsha, referendým degenimiz - zaıyrly, quqyqtyq memleket úshin mańyzdy ózgeristerdi halyqpen keńese otyryp sheshý.

«Osynaý búkilhalyqtyq referendýmda elimizdiń Konstıtýtsııasyna engiziletin irgeli ózgerister men tolyqtyrýlar daýysqa salynbaq. Konstıtýtsııa – el ómiriniń barlyq salasyn qamtyp, memlekettiliktiń negizin, qoǵamdyq qatynastardyń ózegin retteıtin basty zań, erekshe ustyn bolǵandyqtan, oǵan engiziletin ózgeristerdi kóp bolyp talqylaý, keńese otyryp ortaq sheshim qabyldaý – aıryqsha mańyzdy», - dedi qala ákimi.

Sondaı-aq, Erbolat Dosaev bul referendýmnan elimizdiń eshbir azamaty qalys qalmaýy kerek ekenin atap ótti.

«Munda halyqtyń búgingi ómiri ǵana emes, erteńgi urpaq, keler býynnyń da taǵdyryna tikeleı áser etetin keleli sheshimder qabyldanbaq. Elimizdiń bolashaǵyna, qoǵam ómirine beıjaı qaramaıtyn barsha azamat, qalamyzdyń turǵyndary osynaý mańyzdy sharaǵa bir kisideı atsalysyp, óz tańdaýyn jasaıdy dep senemin. Óıtkeni, bul – azamattyq ustanymymyzdyń kórsetkishi, eldigimizge syn. Endeshe, árqaısymyz mejeli kúni atalǵan sharanyń basynan tabylaıyq», - dedi Erbolat Dosaev almatylyqtardyń aldynda.


Jańalyqtar

MURAǴAT