Qaztrade bıznesti qoldaýda eksporttyq akseleratsııa men marketpleısterge shyǵarýdy bastaıdy
2022 jylǵy 19 qańtar 14:55

Qaztrade bıznesti qoldaýda eksporttyq akseleratsııa men marketpleısterge shyǵarýdy bastaıdy

NUR-SULTAN. QazAqparat – 25 qańtarda shaǵyn jáne orta bıznesti qoldaý aıasynda qazaqstandyq eksporttaýshylar úshin eki baǵdarlamaǵa irikteý bastalady. Osy oraıda «Eksporttyq akseleratsııa-2022» jáne kompanııalardy Alibaba.com. baǵdarlamasyna shyǵarý eskerilgen, dep habarlaıdy QazAqparat.

Atalǵan baǵdarlamalardyń operatory retinde QR Saýda jáne ıntegratsııa mınıstrliginiń «QazTrade» AQ bekitilgen.

«EKSPORTTYQ AKSELERATsIıA-2022» - kompanııany tolyq súıemeldeýdi (oqytý, dıagnostıka, eksporttyq strategııany ázirleý, marketıngtik ilgeriletý, kompanııanyń kórmelerge qatysýyn qamtamasyz etý), sondaı-aq senimdi satyp alýshyny izdeýdi jáne eksporttyq kelisimshart jasasýdy kózdeıtin praktıkaǵa baǵyttalǵan baǵdarlama. Bıyl «EKSPORTTYQ AKSELERATsIıA-2022» baǵdarlamasyna qatysý úshin mashına jasaý, hımııa, jeńil jáne tamaq ónerkásibi, sondaı-aq qyzmet kórsetýshiler sııaqty salalarda 190 kásiporyn irikteletin bolady.

«Baǵdarlama aıasynda qazaqstandyq ónimdi naqty ilgeriletý úshin Reseı Federatsııasy, Ýkraına jáne Ázerbaıjan, Birikken Arab Ámirlikteri, Saýd Arabııasy jáne Ózbekstan Respýblıkasy nysanaly naryqtar bolyp aıqyndaldy», - delingen Saýda mınıstrligi málimetinde.

Baǵdarlamaǵa bıznestiń qatysýy tegin. Baǵdarlama 2020 jyly iske qosylǵan sátten bastap qatysýshy kompanııalar shamamen 150 mln AQSh dollary somasyna eksporttyq kelisimsharttar jasasty. Bul otandyq ónimdi RF, Qytaı jáne Ortalyq Azııa elderiniń naryqtaryna jetkizýge arnalǵan uzaq merzimdi kelisimsharttar.

Otandyq bıznesti halyqaralyq Alibaba.com marketpleısine shyǵarý

Bıyl Alibaba.com-ǵa shyǵarý úshin shıkizattyq emes ónimniń 70 qazaqstandyq ónim jetkizýshisi iriktelip alynady. Búginde halyqaralyq seriktester platformasynda 4000 otandyq taýar qoljetimdi. Máselen, qazaqstandyq bal BAÁ, AQSh, Kıpr, QHR, Ózbekstanǵa jóneltildi. Kómir súzgilerin jańadan óndirýshi Alibaba.com arqyly óz satyp alýshylaryn Ózbekstan, Qyrǵyzstan jáne Makedonııadan tapty.

«Baǵdarlamany iske qosý aıasynda 25 qańtarda QazTrade barlyq nıet bildirýshiler úshin tanystyrý vebınaryn ótkizedi, onda Baǵdarlamalarǵa qatysý sharttary týraly aıtyp beredi», - delingen mınıstrlik habarlamasynda.

Atap aıtqanda, eksporttaýshylardy Alibaba.com-ǵa shyǵarý jónindegi baǵdarlama bastalǵan sátten (2019 jyldan) altyn akkaýnttardyń ıeleri 120 mln AQSh dollary somasyna eksporttyq kelisimsharttar jasasty.

QazTrade shıkizattyq emes eksportty damytý jáne ilgeriletý salasyndaǵy ulttyq ınstıtýt bola otyryp, otandyq eksportqa baǵdarlanǵan kásiporyndar úshin mynadaı qoldaý kórsetedi:

-syrtqy naryqtarǵa shyǵý máseleleri boıynsha konsýltatsııalyq-taldamalyq qoldaý;

- halyqaralyq elektrondyq alańdarǵa shyǵarý;

- eksporttyq akseleratsııa baǵdarlamasy;

- servıstik qoldaý (saýda-ekonomıkalyq mıssııalarǵa, halyqaralyq kórmelerge qatysý);

- qazaqstandyq ónimdi syrtqy naryqtarǵa jyljytý jáne jetkizý boıynsha shyǵyndardy óteý.


Avtor:
Tilshi

Jańalyqtar

MURAǴAT