Qazaq TV telearnasy «Tumar» júldesin jeńip aldy
2022 jylǵy 28 maýsym 20:27

Qazaq TV telearnasy «Tumar» júldesin jeńip aldy

NUR-SULTAN. QazAqparat – Prezıdent Teleradıokesheni quramyndaǵy «Qazaq TV» telearnasy «Tumar» ulttyq televızııalyq júldesin jeńip aldy, dep habarlaıdy QazAqparat tilshisi.

«Qazaq TV» telearnasy ázirlegen turmystyq qorlyq-zombylyqqa qarsy «Jena» jobasy «Úzdik rejısserlik jumys» nomınatsııasynda jeńimpaz atandy. Ony tanymal rejısser Qanat Beısekeev túsirgen.

«Qanat, bul seniń syılyǵyń. Ol qazir túsirilimde júr, sondyqtan búgin kele almady. Biraq ol barshańyzǵa sálem joldady jáne kásibı merekemen quttyqtady. Áriptesterimdi quttyqtaǵym keledi jáne jumystaryńyzdan lázzat alýdy tileımin. Qazir osy sahnada jas qyzymmen birge qoǵamymyzda turmystyq zorlyq-zombylyqtyń joıylýyn tilegimiz keledi», - dedi «Qazaq TV» telearnasynyń dırektory Maııa Bekbaeva.

Aıta keteıik, elordada «Tumar-2022» ulttyq televızııalyq syılyǵynyń jeńimpazdary marapattaldy. Televızııalyq sheberlik úshin beriletin «Tumar-2022» ulttyq syılyǵynda 10 nomınatsııa bar. Bıyl syılyq alýǵa 300-ge jýyq ótinim kelip túsken, eń kóp ótinim «Úzdik derekti fılm», «Úzdik aqparattyq baǵdarlama», «Úzdik áleýmettik joba», «Úzdik telejýrnalıst», «Úzdik telejúrgizýshi» nomınatsııalary boıynsha qabyldanǵan.

«Tumar» júldesin marapattaý keshinde «Balalar jylyna» erekshe mán berildi. Keshti balalar júrgizdi jáne barlyq jeńimpazdar balalarmen birge sahnaǵa shyqty.

«Tumar» ulttyq televızııalyq báıgesi 2017 jyly Qazaqstan Respýblıkasy Aqparat jáne qoǵamdyq damý mınıstrliginiń bastamasymen qurylǵan. Syılyq jeńimpazdary qazaqstandyq televızııany damytýǵa qosqan úlesi úshin «Tumar» músinshesi men 1 mıllıon teńge kóleminde aqshalaı syıaqy alady.


Jańalyqtar

Úrdis

MURAǴAT