+7 (701) 759 90 19
USD 412.10 EUR 454.34
RUB 5.82 CNY 57.62
Jańalyqtar

Prıma-balerına: Sezimderimdi jetkizýge múmkindik beretin dramalyq rólderdi oınaǵym kep turady

2020 jylǵy 23 mamyr 16:44
Bólisińiz:
Prıma-balerına: Sezimderimdi jetkizýge múmkindik beretin dramalyq rólderdi oınaǵym kep turady

NUR-SULTAN. QazAqparat - Bıyl «Astana Opera» opera jáne balet teatry úshin basty jańalyq - kompozıtor Lıýdvıg van Bethovenniń 250 jyldyǵyna oraı qoıylatyn «Bethoven - Máńgilik - Mahabbat» baletiniń álemdik premerasy. Baletti nemis horeografy Raımondo Rebek qoıǵan. Atalǵan teatrdyń prıma-balerınasy, Qazaqstannyń eńbek sińirgen qaıratkeri, Mahabbat abstraktili rólinde oınaǵan Áıgerim Beketaeva QazAqparat tilshisine baletti qoıý barysyndaǵy qıyndyqtar men óz partııasyn qalaı bılep shyqqany týraly aıtty.

«Bul - álemdik premera. Biz Lıýdvıg van Bethovenniń 250 jyldyq mereıtoıyn birinshi bolyp atap ótkenderdiń qataryndamyz. Balet qoıýshy Raımondo Rebekpen buryn da jumys istegenbiz. Onymen jumys istegen maǵan unaıdy, ári qyzyqty, sebebi onyń jumys tájirıbesi mol jáne baletke degen ózindik kózqarasy bar. Bul - bizdiń týyndymyz. Bul spektakl álemdegi eshbir teatrda qoıylǵan joq. Bul balet bizge arnap qoıylǵan. Aıtarlyqtaı kóp jumys atqaryldy. Mysaly, búgin eki mınýttyq dýet qoısaq, erteń kelgen kezde ol bárin ózgerte salýy múmkin. Biz artıst retinde qoıylymǵa óz úlesimizdi qostyq. Raımonda horeografııany óte jaqsy oılastyrǵan. Bul balette ol negizgi tórt obraz jasady jáne tórteýi de kúrdeli boldy. Bastapqyda onyń ne qalaıtynyn, ne oılaǵany bar ekenin bilmedik. Bul qoıylymda maǵan bári unady. Raımondo Rebektiń ózine ǵana tán ereksheligi bar», - deıdi Áıgerim Beketaeva.


Balerınanyń aıtýynsha, balettiń ereksheligi men qıyndyǵy - orkestr, hor, balet - bári birge qatysýynda.

«Men abstraktili rólde oınadym. Meniń keıipkerim - Mahabbat boldy. Bastapqyda óz partııamdy qalaı oryndaıtynymdy bilmedim. Mahabbatty jetkizý - qıyn. Erekshe sezimdi júregimnen ótkizýim kerek boldy. Óz tájirıbeme súıenip, mahabbaty qalaı túsinetinimdi, oǵan degen qarym-qatynasym qandaı ekenin kórsetýim kerek dep sheshtim. Men basqa baletterdegi mahabbat kúshi jeteleıtin barlyq keıipkerlerimdi jınaqtaý arqyly óz kózqarasymdy bildirgim keldi. Meniń sahnadaǵy serigim - Bethoven rólindegi Baqtııar Adamjan boldy. Onymen bıleý yńǵaıly ári jaıly. Onyń keıipkeri maǵan mahabbattyń ne ekenin túsinýge jáne qabyldaýǵa kómektesti», - deıdi prıma-balerına.

Áıgerim Beketaeva álemdik premeraǵa eki aı daıyndalǵanyn aıtty.

«Shynaıy ómirde Bethoven mahabbatty tańdaǵanda, Bethoven Bethoven bolmas edi. Ondaı jaǵdaıda qazir biz biletin shedevrlerdi dúnıege ákelmes edi», - deıdi ol.


Balettiń negizgi oqıǵasy Bethovenniń balalyq shaǵynan bastalady. Onyń ákesi óte qatal adam bolǵan. Ol Bethovenniń shyǵarmalaryn qabyldamaǵan jáne tyńdaǵysy kelmegen. Ol balasyna ursyp, ózge kompozıtorlardyń shyǵarmalaryn oryndaýǵa májbúr etken. Osy spektaklde Motsart pen Gaıdn - onyń ustazy, jolbastaýshysy retinde oınaıdy. Bethoven olarǵa ókpelep, balǵa ketip, sol jaqta óziniń Mahabbatyn kezdestiredi.

«Mahabbatyn jolyqtyrǵan Bethoven «Aı sonatasyn» shyǵarǵan. Ol qoǵam onyń dertin qalaı qabyldaıtynyn ýaıymdap, qoǵamnan oqshaýlana bastaǵan. Ol sańyraý kúıinde «9-sımfonııany» jazǵan. Osy kúıinde dırıjer bolǵan jáne kórermenniń qol shapalaqtaýyn da estimegen. Bul balettiń dramatýrgııasy Dert partııasynda anyq baıqalady. Eshteńe estimeý - óte qıyn. Baqtııar Adamjan osynyń bárin jaqsy túsindi jáne obrazyn jaqsy somdaı bildi. Qoıylymǵa daıyndyq barysynda Ramondo Rebek artısterge óz betimen obraz somdaýǵa múmkindik berdi. Kez kelgen artıst úshin bul - úlken artyqshylyq. Osy múmkindikti paıdalana otyryp obrazdy qalaı túsinetinińdi kórsetýge bolady», - deıdi ol.

Áıgerim Beketaeva «Astana Opera» opera jáne balet teatrynyń barlyq repertýarynda óner kórsetedi. Ol somdaıtyn ár keıipkerdiń óz ereksheligi bar. Ol «Aqqý kóli» baleti partııasyn jaqsy kóredi. Aqqý beınesi - onyń janyna jaqyn obraz.

«Men osy jerge jumysqa ornalasqan kezde maǵan birden Aqqý róli buıyrdy. Ol kezde qandaı sezimde bolǵanymdy jetkizý múmkin emes. Sol kezden bastap jańa partııalardy bılegim kelip, ónerge degen qumarlyǵym oıandy. Alǵash oınaǵan Aqqý róli men qazir somdaıtyn Aqqý róli eki túrli. Ýaqyt ótken saıyn tehnıkalyq turǵyda qıyndap, jańa reńk paıda boldy. Maǵan jylaýǵa da, kúlýge de bolatyn, sezimderimdi jetkize alatyn dramalyq rólderdi oınaǵan unaıdy», - deıdi ol.


Ol karantın kezinde repetıtsııa qalaı ótetinin aıtty.

«Bizdiń denemiz - kútimdi qajet etetin aspap. Karantınniń men úshin paıdasy da boldy dep aıta alamyn. Barlyq vıdeomuraǵatpen jumys istep, kitap oqyp, fılm kórýge ýaqyt tabyldy. Kúndelikti tańerteń edende jattyǵý jasap, Zoom baǵdarlamasy arqyly ujymmen birge klassıkalyq sabaq óttik. Ókinishke qaraı, karantın jaǵdaıyna baılanysty joldan qalyp qoıdym. Óner kórsetý úshin Japonııaǵa barýym kerek edi. Osy kúndi kóp kútken edim. Sondaı-aq, «Don Kıhot» baletinde meniń premeram bolýy kerek edi», - deıdi ol.


Ol balerına bolý úshin qandaı qabiletter kerek ekenin aıtty.

«Men ónerge janymdy, barymdy salamyn. Kórermenniń qoıylymnan úlken ásermen qaıtqanyn qalaımyn. Kórermenniń qandaı kúıde otyrǵanyn kórý, olarmen emotsııa almastyrý maǵan unaıdy. Bizdiń salanyń ereksheligi: eńbeksúıgishtik - bizdiń ajyramas bir bóligimiz», - deıdi prıma balerına.


Bizdiń kanalymyzǵa jazylyńyz:

Basty sózder: Nur-Sultan, Mádenıet, Óner,
Bólisińiz:

Avtor:

Zarına Qaharman

Zagrýzka...
Pikir qaldyrý
+7
Jiberý
Sondaı-aq... oqyńyz
Zagrýzka...
ONLAIN QYZMETKERLER
REDAKTOR
Kojakeldıev E.
Kojakeldıev E.
954-059
REDAKTOR
Gúlmıra Alıakparova
Gúlmıra Alıakparova
954-059
REDAKTOR
Erbol Janat
Erbol Janat
954-059

MURAǴAT