Prezıdenttiń kadr rezervi jas býynnyń jaýapty qyzmetke kelýi úshin jasaldy - Toqaev

NUR-SULTAN. QazAqparat - Prezıdenttiń kadr rezervi jas býyn ókilderiniń jaýapty qyzmetke kelýi úshin jasalyp otyrǵan ıgi bastama. Bul týraly Aqordada Prezıdenttik kadr rezervke kirgen jastarmen kezdesý barysynda Memleket basshysy Qasym-Jomart Toqaev aıtty, dep habarlaıdy QazAqparat tilshisi.

«Búgingi kezdesýimizdiń mán-mańyzy erekshe. Qazaqta «Júzden júırik, myńnan tulpar» degen jaqsy sóz bar. Sizder Prezıdenttik jastar kadr rezervine ótý úshin arnaıy báıgede baq synap, alǵa shyqtyńyzdar. Bárińizdi shyn júrekten quttyqtaımyn! Ózderińizge belgili, kadrlyq rezerv jasaqtaý úshin aýqymdy jumys atqaryldy. Bul jobaǵa búkil elimiz boıynsha 13 myń adam qatysty. Sonyń ishinen 300 azamatty iriktep aldyq. Naýqanǵa qatysqan barlyq qyzmetkerge rızashylyǵymdy bildirip, olar nazarymyzda qalady dep aıtqym keledi», - dedi kezdesýdi ashqan Memleket basshysy.

QR Prezıdenti el basqarý isine aralasatyn tańdaýly jastardyń qataryna qosylý zor mártebe ekendigin basa aıtty.

«Ózderińiz sııaqty ozyq oıly, básekege qabiletti mamandar elimizge óte qajet. Jalpy, bul - jas býyn ókilderiniń jaýapty qyzmetke kelýi úshin jasalyp otyrǵan ıgi bastama. Osy rette ózderińiz sııaqty bilimdi ári talapty azamattarǵa úlken úmit artamyz. Sizder jańa Qazaqstannyń damýyna aıanbaı úles qosasyzdar dep senemin. Elimizdiń aldynda bıik maqsattar tur. Eń aldymen memleketimizdi odan ary órkendetip, táýelsizdigimizdi nyǵaıtýǵa tıispiz. Sondaı-aq, azamattardyń ál-aýqatyn arttyryp, turmys sapasyn jaqsartýymyz kerek», - dedi Qasym-Jomart Toqaev.

Memleket basshysy bılik pen halyq arasyndaǵy ózara senimdi kúsheıtý mańyzdy mindet ekendigin atap ótti.

«Osyǵan oraı «Halyq únine qulaq asatyn memleket» tujyrymdamasy qolǵa alyndy. Memleketti basqarý júıesin jańǵyrtý maqsatymen aýqymdy reformalar júzege asyrylýda. Munyń bári jańa kezeńge qadam basqan Qazaqstannyń ıgiligi úshin jasalyp otyr», - dedi Prezıdent.