Prezıdenttikke úmitkerlerden lıngvıstıkadan synaq alatyn ǵalymdar kim

2022 jylǵy 28 qyrkúıek, 17:32
Prezıdenttikke úmitkerlerden lıngvıstıkadan synaq alatyn ǵalymdar kim

ASTANA. QazAqparat – QR Ortalyq saılaý komıssııasy prezıdenttikke kandıdattardyń memlekettik tildi erkin meńgergenin anyqtaıtyn komıssııa quramyn bekitý týraly qaýly qabyldady, dep habarlaıdy QazAqparat tilshisi.

«Ortalyq saılaý komıssııasynyń suranysy boıynsha Ǵylym jáne joǵary bilim, Aqparat jáne qoǵamdyq damý mınıstrlikteri, sonymen qatar L.Gýmılev atyndaǵy Eýrazııa ulttyq ýnıversıteti lıngvıstıkalyq komıssııanyń quramyna kandıdattardy usyndy», - dedi QR Ortalyq saılaý komıssııasynyń hatshysy Muhtar Erman OSK otyrysynda qaýly jobasyn tanystyra kele.

Sonymen, onyń dereginshe, komıssııa quramyna myna ǵalymdar usynyldy: fılologııa ǵylymdarynyń doktory, professor, QR Eńbek sińirgen qaıratkeri Ádil Ahmetov, fılosofııa ǵylymdarynyń doktory, professor, QR Ulttyq ǵylym akademııasynyń akademıgi , jazýshy, abaıtanýshy Ǵarıfolla Esim, fılologııa ǵylymdarynyń doktory, professor, QR Ulttyq ǵylym akademııasynyń akademıgi, Jazýshylar odaǵynyń múshesi Janqara Dádebaev, Nazarbaev ýnıversıteti qazaq tili, ádebıeti jáne mádenıeti kafedrasynyń meńgerýshisi, pedagogıka ǵylymdarynyń doktory professor Gúltas Qurmanbaeva, «Egemen Qazaqstan» respýblıkalyq gazeti» jaýapkershiligi shekteýli seriktestiginiń bas dırektory, QR Ulttyq ǵylym akademııasynyń akademıgi Dıhan Qamzabekuly, Ahmet Baıtursynuly atyndaǵy til bilimi ıntstıtýynyń dırektory, fılologııa ǵylymdarynyń kandıdaty Anar Fazyljanova.

«Barlyq kandıdattar qazaq til bilimi men ádebıeti salasynda tanylǵan ári tanymal ǵalymdar. Lıngvıstıkalyq komıssııa otyrystarynyń ańdatpalary OSK-nyń saıtynda jarııa etiledi. Komıssııa otyrystary ashyq túrde ótedi», - dedi ol.

Eske salaıyq, búgin QR OSK prezıdenttikke kandıdattar lıngvıstıkalyq komıssııa aldynda qandaı synaq tapsyratynyn aıtqan bolatyn.


Uqsas jańalyqtar
Seriktester jańalyqtary

Jańalyqtar