Prezıdenttikke úmitkerler lıngvıstıka komıssııasynyń aldynda qandaı synaq tapsyrady

2022 jylǵy 28 qyrkúıek, 17:17
Prezıdenttikke úmitkerler lıngvıstıka komıssııasynyń aldynda qandaı synaq tapsyrady

ASTANA. QazAqparat – Búgin QR Ortalyq saılaý komıssııasy 20 qarashada ótetin kezekten tys prezıdent saılaýyna kandıdattardyń memlekettik tildi erkin meńgergenin anyqtaıtyn komıssııa qurý týraly qaýly qabyldady, dep habarlaıdy QazAqparat tilshisi.

«Qazaqstan prezıdenttigine kandıdattyń memlekettik tildi jetik meńgerýi QR Konstıtýtsııasynyń 41-baby boıynsha lıngvıstıkalyq komıssııanyń qaýlysymen anyqtalady. OSK-nyń osy másele boıynsha quzyreti «QR-daǵy saılaý týraly» Konstıtýtsııalyq zańnyń 54-baby 2-tarmaǵynda kórsetilgen.

Naqtyraq aıtqanda, osy bapqa sáıkes, Konstıtýttsııanyń 41-babynyń 2-tarmaǵyn resmı túsindirý týraly Konstıtýtsııalyq keńestiń sheshimi boıynsha memlekettik tildi bilýdegi kandıdattyń biliktiligin anyqtaý Ortalyq saılaý komıssııasynyń sheshimimen aıqyndalady. QR Konstıtýtsııasynyń 41-baby 2- tarmaǵyn resmı túsindirý týraly Konstıtýtsııalyq keńestiń 1998 jylǵy 9 qazandaǵy №280 qaýlysyna sáıkes, QR Konstıtýtsııasynyń 41-baby 2-tarmaǵy normasynyń memlekettik tildi erkin meńgergen degen bóliginde «qazaq tilinde saýatty túrde oqıdy, jazady, óz oıyn qınalmaı ońaı jetkizedi jáne kópshilik aldynda sóıleı alady» dep aıtylǵan», - dedi QR Ortalyq saılaý komıssııasynyń hatshysy Muhtar Erman OSK otyrysynda.

Onyń atap ótýinshe, úmitkerlerdiń memlekettik tildi erkin meńgergenin anyqtaý OSK-nyń qaýlysyna sáıkes, quramy keminde 5 adamnan quralǵan mamandar kiretin lıngvıstıkalyq komıssııanyń qorytyndysymen aıqyndalady.

«OSK-nyń QR prezıdenttigine kandıdattyń memlekettik tildi erkin meńgergenin anyqtaý rásimi týraly 2005 jylǵy 31 tamyzdaǵy №12/26 arnaıy qaýlysy bar. Prezıdenttikke úmitkerdiń memlekettik tildi erkin meńgergenin anyqtaý úshin birinshi, lıngvıstıkalyq komıssııa usynǵan taqyryp boıynsha kólemi 2 betten aspaıtyn jazbasha tapsyrma jazady. Ekinshi, lıngvıstıkalyq komıssııa usynǵan kólemi 3 betten aspaıtyn mátindi oqý. Úshinshi, lıngvıstkalyq komıssııa usynǵan taqyryp boıynsha kópshilik aldynda 15 mınýttan kem emes ýaqyt sóz sóıleý talap etiledi», - dedi ol.


Uqsas jańalyqtar
Seriktester jańalyqtary

Jańalyqtar