Prezıdenttik jastar kadr rezervine alynǵan 50 úmitkerdiń tizimi jarııalandy

NUR-SULTAN. QazAqparat - Memlekettik qyzmet isteri agenttiginiń tóraǵasy Anar Jaıylǵanova Prezıdent jastar kadr rezervine irikteýdiń 2021 jylǵy nátıjesin jarııa etti, dep habarlaıdy QazAqparat.

Qazaqstan Respýblıkasynyń Tuńǵysh Prezıdenti – Elbasy Nursultan Nazarbaev pen Memleket basshysy Qasym-Jomart Toqaev memlekettik apparatty jetildirý jáne jańa býynnyń ózin-ózi damytýyna qoldaý kórsetý máselelerine erekshe nazar aýdarady.

Qasym - Jomart Toqaev jastar kadrlyq rezervi - bul memlekettiń rezervi ekenin, oǵan qatysýdyń mańyzy el ıgiligi men ony damytý jolyndaǵy jumystarmen baılanysty ekenin atap ótken bolatyn.

Qazaqstan Respýblıkasy Memlekettik qyzmet isteri agenttiginiń tóraǵasy Anar Jaılǵanova bul rezerv jas mamandardy memlekettik qyzmetke tartýǵa oń serpin beretinin jáne onyń maqsaty daıarlanǵan jáne yntaly jastar úshin áleýmettik lıft qurý bolyp tabylatynyn atap ótti,

Ulttyq komıssııa otyrysynyń qorytyndysy boıynsha 50 kandıdat Prezıdenttik jastar kadr rezervine alyndy.

Іrikteýge qatysýǵa barlyǵy 8638 ótinim alyndy.

Rezervshiler tizimine jeke sektordyń 18 ókili, kvazımemlekettik sektordyń 13 ókili jáne 19 memlekettik qyzmetker kirdi.

Sonymen qatar, 24 adamnyń (48%) basshylyq laýazymdarda jumys tájirıbesi bar.

Kandıdattardyń 62%-y sheteldik joǵary bilimi bar, 38%-y qazaqstandyq joǵary oqý oryndarynyń túlekteri.

Іrikteý jeńimpazdarynyń ortasha jasy - 30.

Rezervte Nur-Sultan, Almaty jáne Pavlodar qalalarynyń ókilderi basym.

Bul rette qatysýǵa ótinim respýblıkanyń barlyq óńirinen, sondaı-aq shet memleketterden kelip tústi.

Memlekettik qyzmet siteri agenttiginiń tóraǵasy Anar Jaıylǵanovanyń aıtýynsha, rezervke alynǵan úmitkerlerdiń biri qazirgi ýaqytta Belgııada, Qazaqstan elshiliginde jumys isteıdi.

Tsıfrlyq tehnologııalardy paıdalaný irikteýdiń ashyqtyǵy men utqyrlyǵyn qamtamasyz etti, bul jas qazaqstandyqtarǵa olardyń ornalasqan jerine qaramastan qatysýǵa múmkindik berdi.

Prezıdenttik jastar kadr rezervine irikteý protsesiniń ashyqtyǵy qoǵam, buqaralyq aqparat quraldary jáne azamattyq qoǵam ókilderiniń qatysýymen qamtamasyz etildi.

Rezervke kirgen kandıdattardyń tolyq tizimi Agenttiktiń resmı pkrezerv.gov.kz saıtynda 27 jeltoqsanda jarııalandy.

Rezervke ekinshi irikteýdiń ereksheligi - bolashaq rezervshini tańdaý kezinde onyń jeke mansaptyq ambıtsııalarǵa emes, eń aldymen qoǵamdyq múddelerdi basshylyqqa alatyn transformatsııalyq kóshbasshyǵa tán quzyretteri nazarǵa alyndy.

Agenttik tóraǵasy Anar Jaılǵanova qazirgi Rezerv tek memlekettik qyzmet úshin ǵana jasalǵanyn jáne onda bolý merzimi 3 jyl ekenin atap ótti.

Rezervke engen jastardyń kópshiliginiń ekonomıkanyń túrli salalaryn qamtıtyn jetekshi sheteldik jáne jeke qazaqstandyq kompanııalarda jumys tájirıbesi bar.

Esterińizge sala keteıik, prezıdenttik jastar kadr rezervine irikteý úmitkerlerdiń qujattaryn qabyldaýdan bastalǵan (1-30 qyrkúıek aralyǵynda) jáne ótken aptanyń sońynda irikteý jónindegi ulttyq komıssııanyń otyrysymen aıaqtalǵan júıeli kezeńderden turdy.

2021 jylǵy Prezıdenttik jastar kadr rezervine alynǵan kandıdattardyń tizimi