Prezıdenttik kadrlyq rezervine ótkender qandaı qyzmetter atqarýda
2022 jylǵy 25 naýryz 16:16

Prezıdenttik kadrlyq rezervine ótkender qandaı qyzmetter atqarýda

NUR-SULTAN. QazAqparat – 2019 jyldan beri Prezıdenttik jastar kadrlyq rezervine 350 úmitker iriktelgen. QazAqparat osynsha jastyń qanshasy ózine laıyqty jumys tapqanyna sholý jasap kórdi.

Memlekettik qyzmet isteri agenttiginiń baspaóz qyzmeti usynǵan málimet boıynsha, 2021 jyly Prezıdenttik jastar kadr rezervine kezekti irikteý júrgizilip, memlekettik qyzmetke 50 rezervshi iriktelgen. Buǵan deıin 2019 jyly memlekettik qyzmet pen kvazımemlekettik sektorǵa 300 adam iriktelgen bolatyn.

Aldyńǵydan aıyrmashylyǵy, sońǵy irikteýde rekrýtıng protsesi kandıdattardyń ishki ýájderi men qundylyq baǵdaryn baǵalaýǵa kóbirek baǵyttalǵan kórinedi.

Sondaı-aq, irikteý kezeńderine esse jazý men jobany tanystyrýdyń ornyna sıtýatsııalyq esepterdi sheshý jáne quzyrettilikti baǵalaýǵa arnalǵan minezdemelik suhbaty sııaqty jańa quraldar engizilgen.

«Qazirgi tańda 350 rezervshiniń 219–y jumysqa ornalastyryldy. Ortalyq memlekettik organdarǵa – 103 rezervshi, jergilikti atqarýshy organdarǵa – 39, ulttyq kompanııalarǵa – 41, ózge de jáne jeke uıymdarǵa – 36 rezervshi taǵaıyndaldy», -delingen agenttik dereginde.

Qazirdiń ózinde 19 rezervshi saıası laýazymdardy, 8 rezervshi «A» korpýsynyń laýazymyn atqaryp júr. Sondaı-aq 1 rezervshi Parlament Májilisiniń, 1 rezervshi oblystyq máslıhattyń depýtaty.

Birinshi basshylardyń shtattan tys keńesshileri bolyp júrgen 3 rezervshi taǵy bar. Atap aıtsaq, Respýblıkalyq bıýdjettiń atqarylýyn baqylaý jónindegi esep komıtetine jáne «Amanat» partııasynda rezervshiler osyndaı qyzmet atqaryp júr.

Agenttik málimeti boıynsha, memlekettik organdardyń janyndaǵy konsýltatıvtik-keńesshi organdardyń quramyna 36 rezervshi engizilgen. Olar:

- 1 rezervshi Prezıdent janyndaǵy ulttyq qoǵamdyq senim keńesiniń múshesi;

- 18 rezervshi dırektorlar keńesiniń músheleri (BǴM);

- 4 rezervshi jumys toptarynyń músheleri (AQDM);

- 11 rezervshi qoǵamdyq keńestiń músheleri (MQІA, UEM, QM, EM, Batys Qazaqstan, Qaraǵandy jáne Túrkistan oblystarynyń ákimdikteri);

- 1 rezervshi Qazaqstan halqy Assambleıasynyń múshesi (Shyǵys Qazaqstan oblysynyń ákimdigi);

- 1 rezervshi Prezıdent janyndaǵy Jastar saıasaty jónindegi keńestiń múshesi.

4 rezervshi «Amanat» partııasynyń Saıası keńesiniń quramyna qosyldy.


Seriktester jańalyqtary

Jańalyqtar

Úrdis

MURAǴAT