Prezıdenttik kadr rezervindegi jastar týrızmdi damytý ıdeıalarymen bólisti
2022 jylǵy 25 maýsym 23:01

Prezıdenttik kadr rezervindegi jastar týrızmdi damytý ıdeıalarymen bólisti

NUR-SULTAN. QazAqparat - Prezıdenttiń Іs basqarýshysy Aıbek Dádebaev Prezıdenttik kadr rezervindegi jastarmen kezdesti, dep habarlaıdy QazAqparat.

«Elimizdiń belsendi azamattarymen perspektıvaly ıdeıalardy talqylap, olardy birge iske asyrý qajet dep sanaımyn.

Rezervtegi jastardyń memleket damýy men Prezıdent Іs basqarmasynyń jobalaryna atsalysýǵa daıyn ekendigi qýantty. Búgingi tańda bizde pikirtalas klýby jumys isteıdi, onymen qosa, ǵylymı-tehnıkalyq keńes qurylý ústinde. Osyndaı jastar Іs basqarmasynyń jobalyq jumystaryna aıtarlyqtaı úles qosa alady, aqparattyq-kommýnıkatsııalyq tehnologııalardy damyta alady», - dep jazdy ol.

A.Dádebaev rezervtegi jastardy Prezıdent Іs basqarmasynyń jumysymen tanystyryp, olardy kásibı ujymǵa qosylýǵa shaqyrǵan. Búginde Prezıdent Іs basqarmasynda atalmysh rezervtiń eki múshesi jumys isteıdi.

«Kezdesýde jastar tarapynan birneshe qundy usynys aıtyldy. Mysaly, ulttyq parkterde, onyń ishinde Prezıdent Іs basqarmasynyń qaramaǵyndaǵy «Býrabaı» memlekettik ulttyq parkinde týrıstik servıs standarttaryn engizý týraly tyń ıdeıalar talqylandy», - dedi Aıbek Dádebaev.



Uqsas jańalyqtar
Seriktester jańalyqtary

Jańalyqtar

Úrdis

MURAǴAT