Prezıdenttik kadr rezervi: 132 úmitker kelesi kezeńge ótti
2021 jylǵy 18 qarasha 18:08

Prezıdenttik kadr rezervi: 132 úmitker kelesi kezeńge ótti

NUR-CULTAN. QazAqparat - Qazaqstan Respýblıkasy Memlekettik qyzmet isteri agenttigi Prezıdenttik jastar kadr rezervine irikteýdiń tórtinshi kezeńi - quzyretterdi baǵalaýdyń ekinshi bóliminiń bastalǵany týraly habarlady.

Bul týraly QR Memlekettik qyzmet isteri agenttiginiń baspasóz hatshysy Erhan Tatken óziniń Facebook paraqshasynda jazdy.

«Birinshi bólim, ıaǵnı assessment-ortalyq 25 qazan men 15 qarasha aralyǵynda ótkizildi, oǵan 235 úmitker jiberilgen bolatyn.

Qazirgi ýaqytta assessment-ortalyqtyń qorytyndysy shyǵarylyp, onyń nátıjeleri boıynsha ekinshi bólim– quzyretter boıynsha suhbatqa 132 úmitker ótti.

Quzyretter boıynsha suhbat – bul qurylymdalǵan suhbat túri, munda suraqqa jaýap bergen kezde úmitker óz tájirıbesinen mysaldar keltirýi qajet. Mundaı suhbatta úmitkerdiń tek ózi týraly jáne óziniń tájirıbesi týraly aıtýy, óziniń ótken ómirinen naqty mysaldardy sıpattaýy qajet. Sondaı-aq, jalpy oı-pikirler men boljamdy jaýaptardan aýlaq bolýy mańyzdy.

Quzyretter boıynsha suhbat aǵymdaǵy jylǵy 20-28 qarasha aralyǵynda kásibı HR-menedjerlerdiń qatysýymen onlaın formatta ótkiziletin bolady.

Osy irikteý kezeńiniń erekshelikteri, birinshiden, úmitkerdiń kásibı quzyrettiliginiń deńgeıin anyqtaý bolyp tabylady.

Ekinshiden, suhbat úmitkerdiń naqty tájirıbesin baǵalaıdy jáne úmitkerdiń naqty jaǵdaılarda qalaı áreket etetinin dál boljaýǵa múmkindik beredi.

Kásibı táýelsiz suhbat júrgizýshiler komandasy úmitkerdiń quzyretiniń damý deńgeıin ǵana emes, sondaı-aq úmitkerlerdiń ynta-jigeri men qundylyq baǵdarlaryn baǵalaıtyn bolady, patrıotızm jáne Qazaqstan halqyna qyzmet etý sııaqty qundylyqtar basym bolyp sanalatyn úmitkerler irikteledi.

Sondaı-aq, ár úmitkerdiń nátıjeleri sertıfıkattalǵan HR menedjerleriniń qatysýymen talqylanady.

Osy bloktyń nátıjeleri boıynsha irikteýdiń kelesi besinshi kezeńi – Sarapshylyq komıssııada áńgimelesýge eń úzdik nátıje kórsetken
100-den aspaıtyn úmitker jiberiledi»- dedi Erhan Tatken.

Іrikteý qorytyndysy boıynsha 50 úmitker rezervke alynady.

Prezıdenttik jastar kadr rezerviniń maqsaty - qoǵamdyq jáne memlekettik múddelerdi basshylyqqa alatyn jas talanttardy anyqtaý.


Seriktester jańalyqtary

Jańalyqtar

Úrdis

MURAǴAT