FÝTBOLDAN ÁLEM ChEMPIONATY-2022
  Jańalyqtar  >
  Astana

Prezıdentke qastandyq jasamaq bolǵan advokat 17 jylǵa sottaldy

2022 jylǵy 1 qazan, 09:53
Prezıdentke qastandyq jasamaq bolǵan advokat 17 jylǵa sottaldy

ASTANA. QazAqparat - Astana qalasynyń qylmystyq ister jónindegi mamandandyrylǵan aýdanaralyq soty A. atty aıyptalýshyǵa úkim shyǵardy, dep habarlaıdy QazAqparat qalalyq sottyń baspasóz qyzmetine silteme jasap.

Sot otyrysy Qylmystyq-protsessýaldyq kodekstiń 29-babyna sáıkes jabyq ótti.

Úkimge sensek, A. kináli dep tanylǵan jáne oǵan mynadaı jaza taǵaıyndalǵan:

- memleketke satqyndyq jasaǵany úshin 11 jylǵa bas bostandyǵynan aıyrý

- bir top adammen aldyn ala sóz baılasyp, Eýrazııa ekonomıkalyq odaǵynyń shekarasynan qarý alyp ótkeni úshin 9 jylǵa bas bostandyǵynan aıyrý

- bir top adammen aldyn ala sóz baılasyp, atys qarýyn, jarylǵysh zatty zańsyz satyp alyp, tasymaldaǵany, saqtaǵany úshin 7 jylǵa sottaý

- bir top adammen aldyn ala sóz baılasyp, oq-dári, jarylǵysh zat daıyndaǵany úshin 4 jylǵa bas bostandyǵynan aıyrý

- Qazaqstan Prezıdentine óshigip, onyń ómirine qastandyq jasaýǵa daıyndalǵany úshin 10 jylǵa sottaý

- terrorızm aktisine daıyndyq jasaǵany úshin 10 jyl

- quqyq qorǵaý, arnaıy memorgan qyzmetkerleri men áskerılerdiń ómirine qastandyq jasaýǵa bel býǵany úshin 10 jylǵa bas bostandyǵynan aıyrý

- shaǵyn jáne asa iri kólemde esirtki satyp alyp, saqtaǵany úshin 5 jylǵa sottaý.

Qylmystyq kodekstiń 58-baby 4-bólimine saı oǵan jalpy jıyny 17 jylǵa bas bostandyǵynan aıyrý jazasy taǵaıyndaldy. Ol osy ýaqytty qaýipsizdigi barynsha joǵary túzeý mekemesinde ótkizedi. Sot materıaldarynda onyń mamandyǵy advokat ekeni aıtylady.

Úkim zańdy kúshine engen joq.

Eske sala keteıik, 25 naýryzda elordada QR Prezıdentine jáne birqatar joǵary laýazymdy memlekettik qyzmetkerlerge qastandyq jasaýdy josparlaǵan shetel barlaý agenti, A. atty Qazaqstan azamaty ustalǵan.

Ol bir mezgilde arnaýly jáne quqyq qorǵaý organdary qyzmetkerlerine qatysty terrorıstik aktiler jasaýdy josparlaǵan.

Aldyn ala tergeý barysynda QR azamaty joǵaryda kórsetilgen isterdi shetel memleketiniń tapsyrmasy jáne múddesinde jasaǵanyn moıyndady.


Tegı:
Seriktester jańalyqtary

Jańalyqtar