Prezıdentke kapıtaldy jylystatýǵa qatysty jumys nátıjesi baıandaldy
2022 jylǵy 20 mamyr 17:22

Prezıdentke kapıtaldy jylystatýǵa qatysty jumys nátıjesi baıandaldy

NUR-SULTAN. QazAqparat – Qazaqstan Prezıdenti Qarjylyq monıtorıng agenttiginiń tóraǵasy Janat Elımanovty qabyldady. Qasym-Jomart Toqaevqa Agenttiktiń kóleńkeli ekonomıkaǵa, qarjylyq pıramıdalarǵa jáne elden kapıtaldy jylystatýǵa qarsy kúres salasyndaǵy jumystardyń nátıjesi týraly baıandaldy, dep habarlaıdy QazAqparat Aqordaǵa silteme jasap.

Memleket basshysyna berilgen derekterge sáıkes jyl basynan beri 727 ekonomıkalyq quqyqbuzýshylyq anyqtalǵan jáne 67 mlrd teńgeniń shyǵyny ótelgen.

Prezıdentke adal bızneske jasalatyn qysymdy joıý jónindegi tapsyrmasynyń oryndalý barysy týraly málimet berildi. Atap aıtqanda, Janat Elımanov quqyq qorǵaý organdaryna tán isterdi jalpy qozǵaý tájirıbesi joıylǵanyn málimdedi. Onyń aıtýynsha, qazirgi ýaqytta tirkeletin qylmystardyń sany jyl saıyn azaıyp kele jatqany baıqalady. Tergeý amaldarynyń merzimi 3 ese, aqtaý belgileri boıynsha toqtatylǵan ister sany úshten birge qysqarǵan. Nátıjesinde myńdaǵan azamat pen kásipkerler qylmystyq qýdalaý aıasynan shyǵaryldy. Sondaı-aq, sottarǵa júginetin adamdardyń sany da aıtarlyqtaı azaıǵan.

Qasym-Jomart Toqaev kásipkerlerdiń quqyqtaryn múltiksiz qorǵaý qajet ekenine mán berip, Agenttik basshysyna birqatar tapsyrma berdi.


Jańalyqtar

MURAǴAT