Prezıdentke «Báıterek» holdınginiń atqarǵan jumysy baıandaldy
2022 jylǵy 16 tamyz 18:39

Prezıdentke «Báıterek» holdınginiń atqarǵan jumysy baıandaldy

NUR-SULTAN. QazAqparat - Memleket basshysy Qasym-Jomart Toqaev «Báıterek» holdınginiń basqarma tóraǵasy Qanat Sharlapaevty qabyldady, dep habarlaıdy QazAqparat Aqordaǵa silteme jasap.

Qasym-Jomart Toqaevqa holdıngtiń bıylǵy birinshi jartyjyldyqtaǵy qyzmetiniń qorytyndysy men agroónerkásiptik keshendi qoldaý, halyqty turǵyn úımen qamtamasyz etý baǵytynda atqarylyp jatqan jumystar týraly baıandaldy.

Prezıdentke berilgen málimetterge sáıkes iri bıznesti qarjylandyrýǵa 143 mıllıard teńge, shaǵyn jáne orta bızneske 510 mıllıard teńge, agroónerkásip keshenine 241,3 mıllıard teńge jumsalǵan. Holdıngtiń qoldaýymen jeke qurylys salýshylar jalpy aýdany 759 myń sharshy metr úıdi paıdalanýǵa berdi. Jergilikti atqarýshy organdardyń oblıgatsııalaryn satyp alý arqyly aýdany 56 myń sharshy metr turǵyn úı salynyp, qoldanysqa berildi. Bul rette 39 myń otbasy, sonyń ishinde 7,2 myń kezekte turǵan azamattar jeńildigi bar ıpotekamen turǵyn úı satyp aldy.

Memleket basshysynyń tapsyrmalaryn oryndaý aıasynda holdıng «Jasyl-Damý» AQ qarajaty esebinen otandyq aýyl sharýashylyǵy tehnıkasynyń jeńildetilgen lızıngi baǵdarlamasyna qatysýǵa ótinishter qabyldaı bastady. Jeke turǵyn úı qorynyń jaldaý aqysyn sýbsıdııalaý tetigi engizildi.

Odan bólek Qanat Sharlapaev usynǵan aqparatqa sáıkes 2022 jyly holdıngtiń qoldaý kórsetýimen 2 mıllıon sharshy metr turǵyn úı nemese 29,6 myń páter paıdalanýǵa beriledi. Jalpy, atalǵan sharalar 250 myń adamnyń turmys jaǵdaıyn jaqsartýǵa múmkindik beredi.

Qasym-Jomart Toqaev Qanat Sharlapaevqa bıznesti damytýdy jaqsartý jáne áleýmettik turǵyn úı saıasatyn jetildirý baǵytynda birqatar naqty tapsyrma berdi.


Foto: akorda.kz


Uqsas jańalyqtar
Seriktester jańalyqtary

Jańalyqtar

Úrdis

MURAǴAT